MA Center kan DPWH nakawarak na sa highway

An Department of Public Works and Highways (DPWH) sa Bicol liwat nagwarak na nin mga Motorist Assistance Center sa mga national highway na nakaandam kan saindang pagtabang bako lang problema sa trafico envez kun igwang emerhencia.

Si Regional Director Virgilio Eduarte igwa nang directiva sa gabos na engineering district kan obras publica tanganing maheling kan motorista na igwang MA Center na puedeng dulokon na mahagad nin tabang alagad poon sanang Marso 28 hasta 30, 2024.

Taon-taon ginigibo na ini kan ahencia kun igwang problema an motorista alagad pinadagos ngunian na Semana Santa sa tahaw kan piglalaoman na ribo-ribong mapuli sa rehiyon mientras na mayo nang peligro sa pandemya siring kan nangyari sa nakaaging taon.

Kan Sabado, Marso 23, 2024 mahibog na an bulos kan trafico haling Metro Manila asin iba pang provincia pasiring digdi sa Bicol.

Sa PNP Bicol, an saindang elementos nakawarak na sa mga matatahong lugar tanganing maseguro an seguridad kan publico maging sa nagba-viaje bako lang sa aldaw nin kamahalan maging sa mga bakasyonista sa rehiyon.

An saindang grupo inaapod na Oplan Ligtas Summer (Summer Vacation) 2024 nagsikad na kan nakaaging semana kan saindang mga deployment kan kapupulistan.

Igwa na sindang nakawarak na mga Assistance Hubs asin Police Assistance Desk sa mga gilid kan tinampo na preparadong magtaong asistensya sa publico.

Nagkapera sa mga tatawan atensyon kan PNP iyo an pag-patrolya sa bus terminal, Puerto, beach resort, mga airepuerto, commercial district, simbahan asin sa prosesyon kan mga Santo.

Nakatutok pa an kapupulisan kan saindang operasyon laban sa mga kriminalidad.