Ma-consuelo



Ma-consuelo an politika ngonyan ta huna mo baga sa aga na an eleksyon.


Huna mo haman na an desisyon maski ngani dugay na, haloy pa bago an borotohan sa Mayo 9.


An mga politiko, an mga tao pati an media, mainstream saka social, derecidido na kan saindang kampanya.


An mga survey asin haka-haka mabarago pa yan. An pinaka-mahamot ngonyan pwedeng magbago pa an parong, an mga halangaw an puntos pwede pang magbaba, an mga popular pwede pang ma-ula.


Sa ibong na lado an mga maluluya pwedeng magkusog, an mga dai bisto mabibisto na, an mga mayong kamanungdanan pwedeng magka-igwa nin marhay na direksyon an kandidatura.


Sa mga barobanwaan asin mga distrito sa laog kan provincia maligaon pa an politika.


Si VP Leni na perming nangengenot sa Kabikolan pwedeng maglangkaw an estratura, pwede man magbaliktad. Siring man si BBM saka si Sara.


Digdi sa Bikol naglalataw ngani an ngaran ni Isko Moreno. An pigngangalas ko ta si Manny Pacquiao, an pambansang kamao, pinaka-popular na boxiador bako lang sa Pilipinas kundi sa enterong kinaban, pero maluyahon an saiyang dangog. Bistado lang siyang makuarta asin mayaman pero garo mayong paninindugan. Si Ping Lacson saka si Tito Sotto naglalataw an mga pangaran asin nagluluwas lugod na huna mo iyo an tunay na mga oposisyonista.


Sa mga kandidato para senador si Allan Peter Cayetano an pinaka-bantog ta an saiyang pangako kun siya manggana para senador matatawan niya nin tig 10mil pesos an kada Pilipino. Bilib an mga botantes ta sa programa daang iyan ni Cayetano daog pa an 4Ps maski Inflationary an bagay na ini. Uutangon man pati iyan kan gobyerno hali sa ibang nasyon lalo na sa World Bank.


Kun kuta na si Pacquio para senador gana pa maski digdi sa Bikol. Si Chiz Escudero babayaan an provincia nin Sorsogon bilang gobernador ta mabalik sa senado. Kaya igwa na nin programa sa TV an saiyang esposa na si Heart na may titulong “I Left My Heart in Sorsogon”.


Si Leila De Lima borotohan pa kan mga Bikolano dahil na lang ki Leni pero tagilid siya sa nasyonal. Pareho sinda ni Antonio Trillanes. Si Migz Zubiri biglang nakagiromdom na Bikolano palan siya hali sa Albay.


Si Doctor Willie Ong kun nagkandidato para senador tibaad manggana na alagad para Vice-Presidente natatahuban siya na Sara Duterte, Lito Atienza asin Tito Sotto.


Digdi sa Bikol mahigos man an kampanya ni Rissa Hontiveros asin makusog ta Bikolano man palan an saiyang depuntong agom.


Sabi kaidtong depuntong senador John Osmeña iba man an estilo kan mga Bikolano bilang mga botantes ta ibinoboto sana an kapwa Bikolano.


An mga Cebuano daa kadto nagboroto ki Raul Roco pero dai pigboroto an mga Cebuano arog saiya digdi sa Bikol. Halangkaw sa pwesto si Roco apesar sadit-sadit an Bikol pero si Osmeña na hali sa rona kan mga Cebuano na dakula an botantes hababaon lugod an nakua sa eleksyon nasyonal.


Sa ngonyan bako pang maliwanag an maguiguin resulta kan eleksyon maguin sa lado nasyonal o lado lokal.


Maghirigos-higos ngona asin magarastos.


Sa Albay nahigpit an laban ni Mayor Rosal kontra sa incumbent governor na si Al Francis Bichara orog na ta segun sa bareta si Congressman Joey Salceda na taga-Polangui asin an pamilya Gonzales kan Ligao City nagbalyo na sa kampo ni Rosal.


Digdi sa Camarines Sur haros namamayagpag na si Luigi Villafuerte para gobernador asin si Sal Fortuno JR para vice gobernador.


Pero si Imelda Papin na bistadong pro-BBM, Marcos Loyalist asin incumbent vice-governor igwa naman siyang mga kandidato para alkalde. An pigngangalasan ta an katandem ni Papin na si board member Nelson Julia bako man para ki Bongbong Marcos kundi kampi man guiraray ki Leni.


Si Imelda matao man nin boto ki Bongbong pero dai man mapaganang gobernador ta may lealtad pa man siya ki Governor Migz Villafuerte asin Congresman LRay Villafuerte.


Si Nonoy Andaya man pusog an kandidatura kontra sa mga Villafuerte asin talagang palaban, an problema lang ta enot, duman sa saiyang distrito an mga kalaban niya puro man lang mga partidaryo asin an ikaduwa ta an mga gustong mag-iba saiya na dating kaiba kan kampo ni Villafuerte habo niyang arakoon ta duda siya kan lealtad ta tibaad trayduran siya. Example Ato Peṅa.


Sa Naga gabos na kandidato para ki Leni pero nadiskubre na si dating alkalde John Bongat asin an negosyanteng si Tato Mendoza nagdaralagan tanganing bantayan si Mayor Legacion ta tibaad talaga suportado kan mga Villafuerte arog kan sinabi kadto kan depuntong LRV.


Sa Rinconada helingon ta an sentimiento kan mga taga-duman kun madadara sinda sa kuarta o mapa-apil man guiraray sa kapwa taga-Rinconada.


Kun kuta na si Dato Arroyo nagdalagan pwerte an laban sa segundo distrito pero ngonyan hayahay si LRay ta last term ngonyan si Congresman Villafuerte kaya seguradong malaban si Dato sa otro eleksyon kun may saderi siyang presidente asin vice-presidente kan Pilipinas.


Sa Partido si Fuentebella man guiraray kontra ki Mayor Tony Chavez kan banwaan kan San Jose.


Sa tercer distrito kun sain an incumbent iyo si Congresman Gabby Bordado pigsusurorogan siya ni Joel Cadiz, Cho Roco, Pito Tria asin Noel De Luna.


Sa ordinaryong boruntolan an solo kun pigsusurorogan permi nang daog. Alagad sa politka iba man.An surorog nagkakaturumba asin an solo iyo an natatadang nakatindog.


Dugay na o dai pa dugay pero magmarasid ngona kita ta harayo pa an pirilian.


Mientras tanto kun igwa nang magtao nin sentimos ilaog tulos sa bulsa total an kuartang gingastos kan mga kandidato kun bakong hali mismo sa gobyerno hali sa mga darakulang negosyante asin politiko na iyo an manginginabang sa anuman na maguiguin bunga kan nagdadangadang na eleksyon.