Ma-Sarig na Agri Barangay

Sarong obserbasyon pag nagawe ka sa Barangay Carolina, normal na madadangog sa orolay kan mga taga-duman ang hapot, “anong oras ka mapa-Naga?”. Si enot kong pakadangog kaini, napangirit ako asin direchong hinapot si naghapot, “bakong Naga pa man ang Carolina?”. Napangirit naman lang siya, dai naman nagsimbag. Garo baga sana man yan si pirming reaksyon pag sinabi na may tanuman pa ang ciudad, “saen man yan mga tanuman sa Naga?”

Ang ciudad nin Naga may natatada pang sampulong (10) barangay na konsideradong agrikultural. Saru-saruon ta ang sampulo patukad ang direksiyon, yaon ang Balatas, Cararayan, San Isidro, Carolina, hanggang Panicuason. Pag pababa, masunod ang Pacol asin San Felipe, medio napasuway ang tolong barangay kan Concepcion Pequeña, Concepcion Grande asin Mabolo. Ang pinakasadit na barangay iyo ang Balatas asin ang pinakadakula iyo ang Pacol.

Ang Balatas, Carolina, Cararayan, Concepcion Grande, Concepcion Pequeña, Mabolo, Pacol, San Felipe iyo ang mga barangay na nagtatanom nin paroy. Ang mais yaon sa Carolina, Pacol asin Panicuason. Ang gulay o High Value Crops yaon sa Carolina, Mabolo, Pacol asin Panicuason. Igua pa kita nin dikit na tanom na abaca sa Panicuason, sa paanan kan Mt. Isarog. Ang mga burak o cutflowers na gamit pag aldaw nin mga puso, semana santa asin undas, hale sa Pacol. Mas nagsisikat ngonian ang sunflowers kaibahan kan si mga dati nang tinatanom arog kan aster, chrysanthemum, regatta asin iba pang klase.

Sa dalagan kan ciudad, ang mga barangay agrikultural na nasabi iyo ang nagkokontribwer sa lokal na ekonomiya asin iyo ang padagos na sinusuportahan kan lokal na gobyerno. Ini ang normal na dalagan kan mga programa asin mga proyekto sa halawigon nang panahon, ang sabi ngani kayan, since time immemorial. Ta iyo man baga talaga ang dapat ang dalagan asin direksyon.

Sa enot na pagkakataon, may bagong direksiyon na puede tang hilingon na ma-aser asin puedeng maging pangarogan. Kan sarong aldaw may naresibe akong imbitasyon, magkakaigwa nin Farmers’ Field School (FFS) ang Barangay Pacol ngonian na huring semana nin Mayo. Ang FFS, pirming agriculture office kan lokal na gobyerno ang nag-oopreser sana kayan. Ngonian sana nagkaigua nin barangay na ang nag-inisyar kan aktibidad asin ang mas maogma pang bareta, pondo pa kan barangay. Saen ka pa!

Ang boot sabihon sana kaini, seryoso ang liderato kan Barangay Pacol pag-abot sa pagpakusog asin pag-ataman sa mga paraoma kaini. Ang nasabing FFS manungod sa pagtanom nin gulay na papartisiparan kadaklan nin mga nanay na igua nin mga aki na “undernourished” segun sa Barangay Nutrition Scholar (BNS). Mapoon ang FFS sa Hunyo asin matapos sa Hulyo, ang bulan nin nutrisyon. Ngonian pa sana, mawot ming ipaabot ang congratulations sa inisyatibo kan Barangay Pacol sa liderato ni Punong Barangay Ruben Limbo kaiba ang Chairman kan Committee on Agriculture, Kagawad Gerry Aspe asin ang samuyang mahigos na Barangay Agricultural Technician, Ms. Malyn Dolor. Lugod, maging kapinonan ini kan mas lalo pang makusog na sektor nin agrikultura sa sampulong agri barangay kan Naga.

Mawot mi man pasalamatan ang Barangay San Felipe, Barangay Balatas, Barangay Concepcion Grande, Barangay Bagumbayan Sur sa saindang suporta sa agrikultura sa paagi nin pag-alokar nin pondo asin pakikipagtabangan sa mga proyekto asin programa kan ciudad. Nagtutubod kita sa pagbabago na nagpopoon sa barangay, pagreplikar kan mga maray na gawe o practices hanggang sa mag-angat ang sektor kan paraoma asin mga parasira.