Magbarakal kita asin magbasa nin Bicolmail

Ngonyan na P8 pesos na an kada kopya kan Bicol Mail, sabi ni Papa Bert delos Martires sa saiyang programa sa radyo orog na naguin masulong na an benta kan diyaryo lokal sa newsstand ni Vacion sa may Plaza Rizal bako huli ta may column siya, ako asin si Goyo Castilla na ngonyan baga pirme nang Bikol an pigpapadarang estorya.

Maski si Belen asin si Lina diyan sa General Luna nagsasabi totoo yan ta maski idtong dati dae nagbabarakal nin diyaryo nagbabarakal ngonyan.

Garo nagpoon ini kan pundohon ni publisher Nilo P. Aureus sa laog nin sarong bulan kan Setyembre kan sarong taon na nakabigla kan Naga asin Bikolandia, bako lang kan ordinaryong namamanwaan kundi pati kan simbahan.

Segun ki Nilo igwa kaya siya nin debosyon ki Ina na may promisa na dadagos-dagoson an Bicol Mail kaya ibinalik niya pakatapos sana nin sarong bulan na pagpinto.

Sa parte ko poon pa kadto maski mayo pa ako nin column talagang nag-didistribuir na ako kan diyaryo lokal arog kan Vox Bikol kadto, Bikol Reporter, Bikol Daily asin kan Bicol Mail sa administrasyon ni editor Joe Perez (konsehal na ngonyan).

An tuyo ko kaidto sa pagdistribuir nin libreng diyaryo maski sa parasimba diyan sa Cathedral, San Francisco asin Peήafrancia Shrine iyo an kampanya kan pagbasa.

Maski sa Milaor, sa Villa Corazon subdivision asin sa centro naglilibrar ako nin libreng diyaryo, an iba nagduduruman sa harong tanganing maghagad bako lang an mga parasimba kundi pati maestro asin mga eskwela.

Mina-arkila ako nin padyak kun mayo an aki kong maestrong si Don Vito pagdistribuir nin Bicol Mail sa apat na barangay kan poblacion sagkod sa balyong salog sa barangay Dalipay.

Nakahaman ako nin sarong libro hali sa sakuyang column kan naka-aguing mga taon na an mga kopya naka-abot sa abroad arog kan Canada, Estados Unidos, Hongkong, Taiwan, Singapore, Dubai, Australia, Switzerland, Norway, Belgium etcetera dara an pangaran kan Bicol Mail, the only regional newspaper in Bicolandia.

Naiskramintar ko na anodaw kun magbarakal naman kita nin diyaryo diyan sa mga newstands o bookstores arog kan Saint Paul ta habang mahal na baga an pag-imprinta nin diyaryo, mahal an papel, mahal an pag-imprinta, mahal an sweldo kan mga empleyado kan diyaryo.

Maguiguin kompleto na an pagsurat o journalism kun an mga reporters, an mga editors, an mga columnists igwa naman sweldo o income hali sa mga parabasa asin an pag-guibo nin diyaryo maguigui nang tunay na negosyo asin propesyon.