Maghapot kita ki Father

Dear Father Bill,

Bilang bakong Catolicong Cristiano, kun ako magpa-bonyag, ano an mga  praktikal na katotoohan an dapat kong maaraman?

An minagalang, Cecilia

Dear Jay,

Kadakul pwedeng magin simbag sa hapot na ini alagad ilaag ta sana an punto sa mga temang naka-centro ki Jesus bilang tagapag-ligtas.

Enot, huli sa kasalan na satong minana ki Adan asin Eba, mga representante kan katawohan, kaipuhan ta nin kaligtasan sa makasalanon na kamugtakan (sinful living condition) kun saen kita namundag gabos. Digdi minalaog an papel kan bonyag na  naghahali o nagpapatawad kan kasalan na satong minana sa enot tang mga magurang.

Ikaduwa, sa mayong sukol na pagkamoot nin Dios sato, ipinadara nya an saiyang bogtong na aking si Jesus sa kinaban tanganing tuboson kita sa kasalan.  Huli sa pagkamoot na iyan,  ipinako Siya sa Cruz, nagadan asin nabuhay-liwat -- digdi nawaran nin kapangyarihan an karatan asin kagadanan sa satong buhay bilang tawo.

Ikatolo, an kaligtasan na ini dinara nin Dios para sa katawohan. Minsan si mga nagadan na bago pa mag-abot si Jesus, nag-ako man kan kaligtasan na ini. Pati idtong mamumundag pa sana sa mga maabot na panahon yaon na man an oportunidad na ini nin kaligtasan. Minsan an dai nag-aaram kaini pwedeng mag-ako kan kaligtasan na ini kun sinusunod ninda an saindang consciencia asin ginigibo ninda an mga bagay na ikinakaogma nin Kaglalang -- boot sabihon maray an saindang mga gibo. Kun siring an kapangyarihan nin Dios yaon sa gabos. Padagos na binubuhay o sinususteneran kan kapangyarihan Niya an gabos na nilalang.

Ikaapat, obligado kita na ibalangibog an marhay na baretang ini sa gabos. Bako sanang pakasabot asin pagsabuhay kan katotoohan, dapat ipalakop ini para an iba mag-ako man nin kaligtasan asin makabalik sa gracia nin Dios. 

An minagalang, Fr. Bill

* * *

Email me at: billparisadmu@gmail.com