Maghapot kita ki Father

Dear Father Bill,

Sunod sunod an bagyo na nag-agi nagdara ini nin destroso asin and dakul an nagsapo nin kasakitan. Kabotan kaya nin Dios an pagsapo ta nin destroso asin kasakitan?

An minagalang, Ludet

Dear Ludet,

Bakong kabotan nin Dios an kagadanan kan katawohan huli sa calamidad o iba pang mga maraot na pangyayari. Kabotan Niya an kaligtasan nin kada saro (2 Pet 3:9). Siring man, nabubuhay kita sa kinaban na rinaot kan karatan. Sa pinakahababang estado, an pagtubod sa dakulaon na kabotan nin Dios nangangahulugan nin pakasabot na an gabos na bagay naghihiro pasiring sa sarong direksyon.

Inaako nin Dios an responsibilidad sa panahon na kalmado o may calamidad sa buhay kan Saiyang mga linalang, pero bakong tama na laganan ta an Dios nin motibo o intensyon sa mga mayor na pangyayari na nagdadara nin pagkaraot kan mga pagsara-sadiri asin buhay nin tawo.

An pagsakit pirming parte kan plano nin Dios ki Jesus magin sa mga tawo man. Kun magraraot an boot mo sa katotoohan na ini, isinasarado mo an ibang parte kan buhay mo Saiya. Igwang mga parte kan satong kalag na maaabot sana sa paagi nin pagsakit.

An sabi kan mga teologo, igwang tolong klaseng kabotan an Mahal na Dios: enot, an “decretive will of God;” ikaduwa, an “preceptive will of God;” asin ikatolo, an “permissive will of God.” Tandaan ta an ikatolo ta pwedeng itogot nin Dios na mangyari an sarong calamidad pero bako Siyang direktang ginikanan kaini. Ini hale sa natural na interaksyon kan mga fuerza kan panahon. Kun may paghuros kan daga asin dakul nagadan, ini reaksyon kan kapalibotan sa daing tapos na pagputol nin kahoy o pagkua nin daga sa mga bukid. Bako man ining hale sa Dios o gibo nin Dios.

Kun siring, an ano man na bagay na maraot asin nagdadara nin destroso, kagadanan, problema, helang, asin iba pa, bako ining gikan sa Dios. An mga maray asin matanos na bagay sana an hale Saiya.

An minagalang, Fr. Bill

* * *

Email me at: billparisadmu@gmail.com