Maghapot kita ki Father

Dear Father Bill,

Ano an boot sabihon kan Inmaculada Concepcion ni Maria? Tano ta an saiyang imahen igwa nin halas sa pamitisan?

An minagalang, Connie

Dear Connie,

Sa Inmaculada Concepcion (Immaculate Conception) pinagse-celebrar ta an kafiestahan kan saro satuya, sarong babae na dai nadigtaan nin kasalan - si Maria kan Nazareth, an Malinigon na Ina nin Dios. Igwang apat na “dogmas of faith” an ipinapanongod ki Maria: enot, an “Inmaculada Concepcion;” ikaduwa, an “Perpetual Virginity;” ikatolo, an “Divine Maternity;” asin an ikaapat, an “Assumption into Heaven after her death.”

Ano an Inmaculada Concepcion? Ini an pagbados ni Sta. Ana ki Maria na dai nadigtaan kan Kasalan na Orihinal. Huli sa pinakaenot na kasalan ni Adan asin ni Eba, an gabos na tao ipinagbados sa tulak kan saindang mga magurang na mayong grasyang nagpapabanal (sanctifying grace), an buhay kan satong mga kalag.

Si Maria, kaipuhan man tubuson sa kasalán, kaya an kaligtasan na dolot kan pagsakit, pagkagadan, asin pagkabuhay-liwat ni Jesus, itinao na ki Maria bago pa man ini maotob ni Jesus na saiyang Aki. Kaya si Maria dai nanggad nadigtaan kan kasalan na orihinal.

An “Inmaculada” nangangahulugan na mayong digta. Huli ta an kasalán sarong digta sa kalag, na dapat malinig sa paghiling nin Dios, nagtutubod an Simbahan na si Maria dai nadigtaan nin kasalán o kakulangan kan grasya nin Dios. Kun siring si Maria, an enot na tinubos, an enot na Cristiano; siya tinubos sa gabos na aspeto - kalag, hawak, asin emosyon.

Ano ta igwa nin halas sa pamitisan kan imagen kan Inmaculada Concepcion? An halas sa irarom kan bitis ni Maria simbolo kan propesia manonongod kan kapangganahan ni Jesus laban sa karatan asin kadaogan ni Satanas (Genesis 3:15). Pinagre-representar kan halas si Satanas asin an karatan. Si Maria padagos an espiritwal pakikipaglaban sa karatan kan kinaban. Sa satong buhay, sa tahaw kan dakul na tentasyon, padagos kitang naghihingowa na magin malinig asin banal, nagpapasalamat asin nagpapakumbaba, dayupot asin dedikado.

An minagalang, Fr. Bill

* * *

Email me at: billparisadmu@gmail.com