Maghapot kita ki Father

Dear Father Bill,

Igwa po ako amiga na nagbalik sa Katolikong Simbahan ngunian na Pasko nin Pagkamundag. Ano po an mawot sabihon kan pagbalik sa Katolikong Simbahan? Ano po an kaipuhan para makabalik?

An minagalang, Belle

Dear Belle,

Nagkapirang praktikal na paagi an pagbalik kan sarong Catolico na nagbalyo sa ibang sekta alagad nag-desisyon magbalik giraray sa pagigin Catolico.

Huli ta dati na man binonyagan sa Catolico bago pa siya naglipat sa ibang sekta, yaon na man siya sa lindong kan Simbahan, kaipuhan nya na lang magbalik sa Dios na pano nin pagsolsol asin akoon giraray an mga katukduan kan Catolicong pagtubod.

Paano ini gigibohon? Mas makahulugan kun an pag-ako saiya sa laog mismo kan Santa Misa. Mas maray man kun gigibohon ini nin Domingo na kun saen dakul an nag-aatender kan Santa Misa. Pakatapos kan sermon, pwede nang ilaog an pagbasa asin pagpirma kan “document of retraction” kun saen ipinapahiling kan tawong nagbalik sa Catolico na tinatalikodan nya an mga katukdoan kan relihiyon na binalyohan nya. Pakatapos kaiyan, siya mismo an mangengenot sa pagpamibi kan Minatubod kaiba an comunidad na nagsirimba. Pakatapos kaiyan, ipapadagos na an misa asin siya mapadagos na sa pag-atender kaini. Kun siya nakapagkumpisal na sa padi, bago kan aldaw na siya nagbalik, pwede na din siya mag-ako nin comunion. Kun dai pa, kaipuhan nyang magkumpisal pakatapos kan Misa.

Siring man, kun may mga pagkatekesis, recollection o prayer meetings sa parokya, mas maray kun tawan niya ini nin panahon para makua niya giraray an buhay o kultura kan aktibong Catolico.

Saro sa mga halimbawa na naggibo kaining “document of retraction” iyo si Jose Rizal bago siya gadanon kan 1896. Sa documento ipinahayag niya an pagbalik sa pagigin Catolico, an saiyang pagbasol sa pag-ayon sa Freemasonry, asin an pagpakaraot niya kan Simbahan. Pero mayong kasiguruhan kun talagang totoo asin bakong gibo-gibo sana an “document of retraction” na ini ni Rizal.

An minagalang, Fr. Bill

* * *

Email me at: billparisadmu@gmail.com