Maghapot kita ki Father

Dear Father Bill,

Ano an inaapod na Pasyon kun minaabot an Cuaresma asin Semana Santa?

Minagalang, Ester

Dear Ester,

Sa Pilipinas, saro sa mga kinatudan na Catolicong debosyon kun Cuaresma o Semana Santa iyo an “Pasyon” o “Pabasa” o “Pabasa ng Pasyon.” Ginigibo an padagos-dagos na pagkanta kan mga agi-agi ni Cristo, orog na an Saiyang pagsakit, pagkagadan, asin pagkabuhay-liwat. An mga para-Pasyonnagsasara-saranglean sa pag-awit kaining istorya na nasa porma nin tula (epic poem).

An Pabasa, sosog sa tradisyon, pwedeng gibohon paglaog kan Miercoles de Ceniza (Ash Wednesday) asin ano man na aldaw sa laog kan Cuaresma hanggang sa pagka-odto kan Viernes Santo o bago mag-alas tres nin hapon (the “ninth hour” of Jesus’ death).

Páno ini ginigibo? An mga parakanta sa Pasyon, kadaklan mga gurang na babae asin nagkapirang mga lalaki, nagsasara-saranglean sa pagkanta. An Pasyon ginigibo sa atubangan kan altar kan familia o sa sarong temporaryong altar sa laog kan harong na nasasamnohan nin sagradong mga gamit sa pagpamibi o imagen nin mga Santo. Alagad an pabasa pwede man gibohon sa mga chapels, sa sarong lugar sa laog kan comunidad, o kun minsan, sa gilid kan mga tinampo.

An Pasyon ginigibo bilang “panatà” (vow) or “ex voto” (votive offering). Tinatawan talaga ini nin panahon kan nagpapa-Pasyon asin ginibo ini kada taon na mayong palta. An Pasyon o Pabasa parte na kan tradisyon asin kulturang Pilipino. Nagdadakul na man mga joven an nagbabali digdi.

An minagalang, Fr. Bill

* * *

Email me at: billparisadmu@gmail.com