Maghapot kita ki Father

Dear Father Bill,

Ano an mangyayari sa pagkadan ni Pope Francis? Ano an mga susunod na gigibohon o mangyayari?

Minagalang, Cyril

Dear Cyril,

An hapot na ini napapanahon huli ta nagagadan pa sana si Pope Francis kan Lunes, Abril 21, 2025. Sa pagkagadan kan sarong Santo Papa, mapoon man an kadakul na mga ritwal na an iba dyan ginigibo na nin labi pa sa 2,000 na taon na an nakaagi, kaiba na dyan an pagpili kan bagong Santo Papa.

An gabos na mga gigibohon na mga ritwal tinipon sa sobra sa 400 na pahina sa inaapod “Ordo exsequiarum Romani pontificis,” kabali na digdi an liturgia, musika, mga pamibi na ginagamit sa pagkagadan kan sarong Santo Papa. Ginamit na an Ordo na ini kan sobra sa 250 Santo Papa na nagadan sa paglipas kan halawig na panahon. An mga ritwal sa Ordo na ini ginagamit poon sa pagkagadan kan Santo Papa sagkod na siya mailobong.

Sa Simbahan na Catolico, an camerlengo sarong cardinal na naglilingkod bilang financial secretary asin treasurer kan Santo Papa. Kun magadan an Santo Papa na saiyang pinaglilingkodan, siya an mamahala sa katiriponan nin mga cardinals (papal conclave) na maboto sa bagong Santo Papa. Siya din an mamamahala sa aroaldaw na operasyon kan Vatican hanggang magkaigwa nin bagong Papa.

Sa ngonyan an camerlenggo kan Simbahan iyo si Cardinal Kevin Joseph Farrell. Siya an mamumuno (preside) sa rito nin kumpirmasyon na gadan na an Santo Papa asin sa paglaog kan saiyang hawak sa kabaong. An rito na ini mangyayari sa Chapel of the Domus Sanctæ Marthæ. Kadakul pang mga rito an gigibohon na masasaksihan kan publiko sa mga maabot na aldaw hanggang siya mailobong.

An minagalang, Fr. Bill

* * *

Email me at: billparisadmu@gmail.com