Maghapot kita ki Father

Dear Father Bill,

Siisay si Papa Francisco sa iba pang aspeto? Ano pa an ibang adal na manunudan ta saiya?

Minagalang, Bernice

Dear Bernice,

Si Papa Francisco pirming sinasabi na an Dios pano nin sorpresa, an Dios mas dakula pa sa limitasyon kan satong imahinasyon asin mga pagmawot. Sa hararom na kapakumbabaan, dai siya natatakot maghagad dispensa sa mga pagkukulang niya asin kan simbahan.

Si Papa Francisco sarong saksi huli ta ipinahiling niya sato kun páno magin parasunod ni Jesus. Ginibo niyang buhay na buhay asin kaakit-akit an Tataramon nin Dios sa mga Cristiano. Ipinahiling niya an simpleng pamumuhay asin dakulang kapakumbabaan sa saiyang pagkatawo. Pinili niyang mag-estar sa duwang sadit na cuarto sa Casa Santa Marta, bako sa mala-palasyong lugar na para sa sarong Santo Papa. Mas pinili niyang mabuhay na harani sa mga kairiba niyang nagtatrabaho aroaldaw.

Dai siya napagal magpahayag nin kadakul na beses na an Dios pagkaherak, malambing, asin harani sato. Sa satong kinaban na baranga, tinukdo niya na akoon ta an gabos, orog na an mga hinahaboan asin nagtitios. Minawot niya na magkaigwa nin kultura nin encuentro, pagkamagturugang, asin katoninongan. Ipinahiling niya na sa pagkamoot asin pagsunod ki Jesus mas nagiging totoong tawo kita -- maheherakon, maogma, asin panò nin katalingkasan.

Pirit niyang ipinagrani an Simbahan sa tawo. Boot niyang ma-realizar an pangitorogan na an simbahan naglalakaw na naka-pokus sa misyon, evagelizacion, dialogo, asin servicio. Kita gabos mga misyonerong disipulos na parareho an dignidad asin responsabilidad bilang mga binonyagan. Sosog sa saiya, kita sarong “synodal Church” na harani sa lambang saro, nag-iiribahan nin maray, nagdadangog, nagpapamibi asin naglalakaw nin sarabay -- comunidad nin mga peregrino nin Paglaom.

An minagalang, Fr. Bill

* * *

Email me at: billparisadmu@gmail.com