Maghapot kita ki Father

Dear Father Bill,

Tano ta an Simbahan may conclave pa, bakong arog kan ibang sekta ipinapasa na sana sa kapamilya o kadugo?

Minagalang, Krissia

Dear Krissia,

An papal conclave iyo an pagtiripon kan mga cardinals na dai pa otsenta (80) años para magboto kun siisay an masunod na Santo Papa na magigin kasalihid ni San Pedro na iyo an pinakaenot na Papa. Pinipili an pagigin Santo Papa, dai minamana. Poon pa kan pagpili ni Jesus ki San Pedro bilang pamayo kan mga apostoles asin fundacion kan saiyang tinogdas na Simbahan, dai naputol an pasunod-sunod kan mga Santo Papa. Sabi nin Kagurangnan, “Sinabihan taka, ika si Pedro, asin sa gapo na ini itutogdok ko an Sakong simbahan” (Mt. 16:18).

Sa ibang mga sekta, minamana o ipinapasa sana an pamamayo o liderato kan saindang grupo dahil ini tinogdas kan saindang mga pamilya, magurang o ninuno. Kun papaagihon ninda sa borotohan, baka mailuwas an liderato kan saindang sekta sa iba. Digdi an pagkakaiba ninda huli ta an saindang sekta o “relihiyon” tinogdas sana nin tawo, bako nin Dios. An Simbahan tinogdas ni Jesus, Dios asin Tawong totoo. Asin poon pa kaidto sagkod ngonyan kumpleto an listahan kan mga namamayo kan Catolicong Simbahan, poon ki Pedro na pinili ni Jesus. Si Papa Leon XIV, an bagong Santo Papa, ika-267 sa pasunod-sunod na ini.

An minagalang, Fr. Bill

* * *

Email me at: billparisadmu@gmail.com