Maghapot kita ki Father

Dear Father Bill,

Ano an National Youth Day na gigibohon sa Caceres poon Junio 11-14? Ano an katuyohan kaini? Boot ko man mag-participar.

Minagalang, Ferdee

Dear Ferdee,

An National Youth Day (NYD) sarong lokal na expresyon kan World Youth Day (WYD) na pinagmukna ni Pope John Paul II, na huring ginibo digdi sa Pilipinas kan taon 1995. An nasyonal na bersyon digdi sa Pilipinas nagpoon pa kan taon 1986, kan pinag-designar kan Catholic Bishops Conference of the Philippines (CBCP) an Deciembre 16 bilang National Youth Day (NYD).

An NYD sarong actividad na kun saen ipinapahayag kan Simbahan sa Pilipinas an mga konkretong paagi kun saen ipinapahiling kaini an saiyang dakulang pagmakulog sa mga jovenes. Ini sarong okasyon na tinatawan nin oportunidad an mga jovenes na i-celebrar asin pararomon an saindang pagtubod. Ini saro man espesyal na momento na magkahirilingan asin magtiripon sinda bilang sarong grupo, nagkakasararo sa paglakbay pasiring sa hararom na relasyon ki Jesus. An Archdiocesan o Diocesan Youth Day ginigibo man taon-taon pag-aabot kan December 16 or anoman na petsa na harani digdi.

Kada taon, an Episcopal Commission on Youth (ECY) inaandam an konsepto kan NYD tanganing magin makahulugan ini sa lokal na konteksto, asin ini dakulaon na naka-depende sa creatividad asin posibilidad kan kada diocesis o organisasyon.

An NYD piggigibo man kada ikaduwang taon sa paagi kan pagtiripon kan mga jovenes sa bilog na Pilipinas. Ngonyan na taon 2025, an NYD gigibohon digdi sa Archdiocese of Caceres ngonyan na Junio 11-14. Maabot sa 7,000 na mga jovenes an mapasiring sa Pilgrim City of Naga na iyo an centro kan okasyon. An simbahan digdi sa Caceres matabang sa ECY sa pagplano asin pag-implementar kan mga actividad sa NYD. An tema kan NYD 2025 iyo an minasunod: “Rejoice in hope, endure in afflictions, persevere in prayer.” An pinagbasehan kaini iyo an Romans 12:12 na kun saen ipinapasabot sa mga jovenes an pinaka-mensahe kan pagtiripon.

Saen maestar an kadakul-dakul na mga jovenes na ini? Igwang mga “foster families” na pigpakiorolayan sa Naga asin sa mga pagtaraed na banwaan para maestaran ninda. An saindang pag-estar sa mga pamilyang ini bako sanang basta-basta huli ta may mga actividad din sindang gigibohon sa laog kan harong, arog baga kan pagpamibi, paghireras-herasan nin paghorop-horop (sharing) sa mga miembro kan familia na saindang pigdagosan asin iba pa. Ini magtatao nin dakulang adal asin pakanood sa lambang saro. Mapuruli sindang panó nin paghorop-horop sa saindang mga lugar. An memorableng experiencia ninda bako sana sa saindang mga inagihan na actividad, kundi sa mga harong pa na saindang pig-estaran.

An minagalang, Fr. Bill

* * *

Email me at: billparisadmu@gmail.com