Maghapot kita ki Father

Dear Father Bill,

Kaipuhan po na sa kada pag-komunyon, magkumpisal muna? Puede magkomunyon sa kada pagsimba?

Minagalang, Almira

Dear Almira,

Dai man kaipuhan na magkumpisal kada maako nin comunion. Mantang itinutulod kan Simbahan na magkumpisal kita sa panahon na kaipuhan ta ini, orog na duman sa mga nakagibo nin kasalan na mortal (loss of sanctifying grace - the divine life in us), arog baga kan paggadan, pagsambay, paglanghad sa ngaran nin Dios, asin iba pa. An pagkumpisal dai man hinahagad kan Simbahan sa gabos na oras, pero ini magdadara sa kabanalan kun dakul na beses gigibohon sa sarong taon.

Kun an sarong Catolico nag-aaram na siya nakagibo nin mortal na kasalan, kaipuhan niyang magkumpisal asin mag-ako nin absolusyon kan padi bago siya mag-ako nin comunion. An mortal na kasalan katakod kaini an mga minasunod na bagay: ini sarong magabat na salang gibo; may lubos na pagkaaram an naggibo; asin isinusuway kaini an tawo sa grasya nin Dios (leads to spiritual death).

Kun an sarong Catolico naman nakagibo nin “bakong magabat na kasalan” (venial sins), dai niya na kaipuhan magkumpisal bago mag-comunion. An halimbawa kan mga “venial sins” iyo an minasunod: may pagduda ka sa saimong tinutubod; nagputik ka para dai makolgan an boot kan saimong kapwa; nabubuta-butahan ka sa sarong salang gibo; pagpabaya sa saimong obligasyon; an pagkontrol kan mga bagay-bagay imbes na paorogon mo an kabotan nin Dios; asin dakul pang iba.

Pigsasabi kan Simbahan na kaipuhan magkumpisal minsan saro sana sa sarong taon para sa mga seryosong kasalan. Pigtutukdo man kan Simbahan na ikumpisal minsan an “venial sins” para magtalubo sa spiritwal na buhay asin magrarom an relasyon sa Dios. An “venial sins” pwede man mapatawad sa paagi nin mga gawe nin pag-penitensya o sacripisyo o paggibo nin mga maray na bagay sa kapwa. Alagad an “mortal sin” nangangaipo kan sacramento nin Pagkumpisal.

An minagalang, Fr. Bill

* * *

Email me at: billparisadmu@gmail.com