Maghapot kita ki Father

Dear Father Bill,

Tano ta an simbahan sinara kun igwang mga krimen, trahedya o ano pa man na salungat sa kasagradohan kaini? Ano an kaipuhan gibohon kun nababalga an pagrespeto sa simbahan?

Minagalang, Pauline

Dear Pauline,

Sa ley kan Simbahan na inaapod “Code of Canon Law,” an Canons 1211 asin 1212 nagpapaliwanag manonongod sa paglapastangan asin pagkawara kan dedikasyon o bendisyon kan sagradong lugar. An Canon 1211 nagsasabi na an mga sagradong lugar nalalapastangan kan mga grabeng mararaot o nakakakulog na gibo na nagdadara nin eskandalo. An Canon 1212 nagpapaliwanag na an mga sagradong lugar nawawara an saindang dedikasyon o bendisyon huli sa kadakulaan kan pagkaraot o permanenteng pagkawara kan religiosong aspeto kaini.

Sosog sa Canons 1211-1212 asin sa mga directiva sa liturgia para sa pag-violar kan sagradong lugar, an obispo minatao nin kasuguan na ipasarado an simbahan o arin man na sagradong lugar, kun may bakong maray na pangyayari digdi. Halimbawa, isasara an simbahan kun igwang ginadan, nag-suicide, o pwersahan na binuksan an tabernaculo asin hinabon an mga laog kaini. An mga tawo o parokyano kan simbahan magkakaigwa nin 3 or 9 na aldaw (depende sa kasuguan) na pagprusisyon bilang pagmondo sa pangyayari asin pag-penitencia o pagbayad sa karatan. Sa bilog na panahon na ini, sarado an simbahan.

Kun tapos na an mga aldaw nin pag-penitencia asin pagmondo sa pangyayari, bubuksan na an simbahan asin digdi gigibohon an Rite of Reparation and Healing tanganing maibalik sa nasambit na simbahan an sagradong karakter kaini asin an magkakanigong kaomayan sa comunidad na naapektaran kan pangyayari. Digdi minamawot na maibalik giraray sa normal an gabos asin makagibo nin magkakanigong mga patakaran para maiwasan an mga madatang pangyayari sa maabot na panahon.

An minagalang, Fr. Bill

* * *

Email me at: billparisadmu@gmail.com