Maghapot kita ki Father

Dear Father Bill,

Ano an katungdan kan CBCP sa simbahan kan Pilipinas asin sa mga Pilipino?

Minagalang, Nicole

Dear Nicole,

An Catholic Bishops’ Conference of the Philippines o CBCP sarong permanenteng organizacion o katiriponan nin mga obispo sa bilog na nasyon na nagpapadalagan nin nagkapirang mga oficinas pastorales (pastoral offices) para sa mga Cristiano sa saindang teritoryo sa paagi nin apostolicong mga plano, programa, asin proyekto na angay sa sitwasyon kan panahon asin lugar para ipalakop an karahayan kan kadaklan na ginigibo kan Catolicong Simbahan sa katawohan. An Pilipinas igwa nin 16 na “archdioceses,” 51 “dioceses,” 7 “apostolic vicariates,” 5 “territorial prelatures” asin 1 “military ordinariate.”

Sosog sa pinakahuring impormasyon, an CBCP igwa nin 84 aktibong mga cardinal, arzobispo, asin obispo. Parte pa man giraray kan CBCP minsan an 38 retiradong mga obispo asin 4 na mga pading administrador kan mga diocesis na mayo pang obispo. An saindang kagabsan na pagtiripon (plenary assembly) gigibohon ngonyan na Julio 2025 na iyo an pinakahalangkaw na katiriponan na nagde-desisyon manonongod sa pastoral, liturhikal, asin iba pang mga bagay na nakakaapekto sa dalagan kan Simbahan sa Pilipinas.

Sosog sa konstitusyon kan CBCP, an katuyuhan kan organizacion na ini, na inaapod “episcopal conference,” iyo na pakusogon an pagkasararo kan Simbahan sa Pilipinas; magin aktibo an Simbahan sa Pilipinas sa mga katuyuhan o dalagan kan pangkinaban na simbahan (universal church); na magampanan an responsabilidad bilang tagapagbalangibog kan Maray na Bareta sa katawohan, orog na sa awtoridad sibil (civil authority).

An minagalang, Fr. Bill

* * *

Email me at: billparisadmu@gmail.com