Maghapot kita ki Father

Dear Father Bill,

Tama daw an pag-upák (clapping) sa laog kan Misa? An iba kaya nagsasabi pwede. An iba nagsasabi bawal daa po.

Minagalang, Carmen

Dear Carmen,

Dai man direktang ipinagbabawal kan Catholic Bishops’ Conference of the Philippines (CBCP) an pag-urupakan sa laog kan Santa Misa, alagad mas maray kun ini dai paggibohon, orog na sa panahon nin Cuaresma asin iba pang solemneng liturgia na pinace-celebrar. Sa General Instruction of the Roman Missal, mayo man deklarasyon na ipinagbabawal an pag-urupakan, alagad tinatawan nin doon kan CBCP na an Misa sarong sagradong celebracion na naka-pokus sa Dios asin bako ining sarong palabás o pagmidbid kan ginibo kan sarong tawo.

Sa Misa mahalaga an paggalang asin an matoninong na pag-celebrar kaini. An pag-urupakan pwedeng maraot an kasagraduhan kaini. Imbes na mag-upak, mas tinutulod kan CBCP an ibang paagi nin pagpahayag nin kaogmahan asin pag-apreciar, arog baga kan panlaog na paghorop-horop asin pamibi, orog na sa celebracion kan liturgia.

Dawa kadaklan na beses ipinapangalad an pag-upak, igwa man mga espesyal na mga solemneng actividad na kun minsan nagkakaigwa nin urupakan arog kan bonyag o ordinacion nin padi. Mas maray kun gibohon an pag-apreciar pakatapos na sana kan Misa. Pwedeng personal na pasalamatan an padi sa magayon na homilia o sa solemneng pag-celebrar nya kaini. Bilang padi, hinagad man talaga saiya na itao nya an gabos (isip, puso asin kusog) sa saiyang pagmisa, kaya dai man kaipuhan mag-upak sa laog kan Misa, dawa may magayon siyang mga sinabi o may extraordinaryong nangyari sa laog kan misa.

An minagalang, Fr. Bill

* * *

Email me at: billparisadmu@gmail.com