Maghapot kita ki Father

Dear Father Bill,

Ngunian, lakop asin sigido an uran na nagka-kawsa nin baha asin pagtupas kan daga, ano daw an katungdan kan mga Cristiano?

Minagalang, Minerva

Dear Minerva,

Kan 2015, si Papa Francisco nagpaluwas nin sarong “encyclical” na inapod sa Latin na “Laudato Si” (Praised Be) manonongod sa pag-ataman kan estaran nin katawohan - an satong planeta. An dokumento para sa lambang tawo na nakaestar sa kinaban asin ini nangangapodan nin pangkinaban na dialogo kun paano nyato bibilogon an futuro kan satong planeta sa paagi kan satong mga pan-aroaldaw na gibo asin desisyon.

An documento naka-centro sa mga isyu nin ecologia, tinatawan doon an koneksyon sa lambang saro kan kapalibotan, sociedad, asin economia. Ini an nagkapirang implikasyon kan “Laudato Si” manonongod sa pag-ataman kan kapalibotan. Enot, an “internal ecology.” Pigmimidbid kaini an halaga kan koneksyon kan gabos na bagay na may buhay kaya kaipuhan atamanon an kapalibotan bilang pag-ataman man sa katawohan.

Ikaduwa, “climate change.” Sinasadol an gabos na magtarabangan sa pangkinaban na isyung ini na nangangaipo nin kasimbagan kan gabos. Mas magayon kun malimitaran o mawara na an “fossil fuels” pasiring sa “renewable energy sources.” Ikatolo, “simple living.” An “Laudato Si” nagsasadol sa gabos nin sarong klaseng pamumuhay na nag-iikot sa simplicidad, moderacíon, pinadikit na pag-konsumo kan mga kaipuhan, na kun saen sinasabi “to reduce waste,” “reuse resources,” asin “recycle.” Ikaapat, “education and awareness.” Kaipuhan mas pahiwason pa an pagtukdo kan “ecological literacy” asin kumbinsiron an iba na maggibo nin mga actividad pasiring sa pagprotehir kan kapalibotan. Ikalima, “policy and advocacy.” Sinasadol an mga naggigibo kan mga policia o ley asin mga grupong may advocacia na tawan prioridad an pag-protehir kan kapalibotan, an pagpapadagos kan mga proyektong pinonan, asin justicia para sa kapalibotan.

Sa kagabsan, sinasabi kan “Laudato Si” kaipuhan ta nin “collective action,” “individual responsibility,” asin “spiritual transformation” para mabago an dalagan kan planetang satong ini-estaran.

An minagalang, Fr. Bill

* * *

Email me at: billparisadmu@gmail.com