Maghapot kita ki Father

Dear Father Bill,

Pirmi ko po nababasa and nahihiling sa mga anuncio na an Naga Metropolitan Cathedral iyo an mother of all churches. Ano po an kahulugan kaini?

Minagalang, Janette

Dear Janette,

An Naga Metropolitan Cathedral pwede man sabihon na “Mother of All Churches” sa rehiyon kan Bicol huli ta an Archidiocesis nin Caceres, na pinamamayuhan nin sarong Arzobispo, iyo an pinaka-centro kan provincia eclesiastica (ecclesiastical province) na nakakasakop sa mga diocesis kan Daet, Libmanan, Legazpi, Sorsogon, Virac asin Masbate. An Archidiocesis mas dakula asin iyo an naghihirong lider kan nagkapirang diocesis sa rehiyon, arog kan mga nasambit.

Sa konteksto kan Catolicong Simbahan, an “Mother of All Churches” iyo an St. John Lateran Basilica sa Roma. Ini an nagkakapot kan titulo bilang ina kan mga simbahan sa ciudad asin sa bilog na kinaban. An titulong “mother church” pwede man gamiton sa mas mahiwas na kahulugan arog baga kan original na simbahan sa sarong lugar o sarong simbahan na ginibong modelo kan sarong bagong simbahan sa konteksto kan pangkinaban na simbahan (universal church).

An St.John Lateran Basilica iyo an opisyal na simbahan kan Santo Papa bilang Obispo kan Roma asin ini an lugar kan Lateran Treaty na nagtogdas kan Vatican City bilang independienteng estado (independent state). Importante an papel kan St. John Lateran sa kasaysayan huli ta ini an pinakaenot na residencia kan Santo Papa asin bilang nangongorog na simbahan kan pinakaenot na Cristianong comunidad.

An minagalang, Fr. Bill

* * *

Email me at: billparisadmu@gmail.com