Maghapot kita ki Father

Dear Father Bill,

Poon pa kan bulan nin Hulyo, wala too na an pagsungko kan imahen ni Nstra Sñra de Peñafrancia sa harayo o harani man, sa ciudad o sa bukid man. Tano po ta ginigibo ining tradisyon na ini?

Minagalang, Mayumi

Dear Mayumi,

An pagsungko ni Ina sarong magayon na tradisyon na pinonan kan lokal na Simbahan. Simple an paliwanag kaini. Siisay baga an habong bisitahon kan Ina. Sa pagbisitang iyan dakul an nakakakua nin kasimbagan sa saindang mga pangangaipo, nagkukusog an nagluluya an pagtubod, naliliwanagan an mga dai na aram kun paano ma-desisyon sa saindang mga ka-dificilan sa buhay. Naipapa-abot pa ninda an saindang mga pangangaipo asin naiisip ninda an mga maray na katangian ni Sta. Maria na pwede nindang arogon.

Si Ina, Patrona kan Bicolandia, dakulang onra na yaon an saiyang presencia sa satong mga kapilya, institusyon, eskwelahan, tindahan, opisina, harong, barangay asin kadakul pang iba. Kun binibisita ka, an nagbibisita igwa pirming darang pasalubong sa mga kagharong. Maogma an mga binibisita, huli ta yaon an maray na bareta asin dakul na pagsasalingoy sa mga nakaagi.

An pagsongko ni Inang Peñafrancia magayon na magpadagos-dagos huli ta bako man perpekto an buhay ta. Si Ina an pirming nagmamangno kan satong pangangaipo. Dai kita pababayaan. Mas harani kita sa Dios kun siya satong iniimbitaran na magsongko sa satong buhay. Pero an pinaka-orog sa gabos, si Ina an satong llave pasiring ki Jesus.

An minagalang, Fr. Bill

* * *

Email me at: billparisadmu@gmail.com