Maghapot kita ki Father

Dear Father Bill,

Tano po ta kaipuhan igwa nin Joint Operation Center asin MOA an Simbahan saka LGU Naga pag Peñafrancia fiesta?

Minagalang, Basil

Dear Basil,

Enot sa gabos an kafiestahan nin Nuestra Señora de Peñafracia sarong religiosong celebracion. Simbahan na nagde-determinar kan mga mayor na parte asin mga actividad kan kafiestahan. An ciudad nin Naga iyo an lugar kun saen mangyayari an gabos na actividad. An ciudad kada taon igwa man sadiring mga piglilinyang mga actividad na nakakadagdag nin gayon asin kolor sa fiesta.

Huli ta an Simbahan asin an Ciudad nin Naga parehong may gigibohon na mga actividad, kaipuhan magkaigwa nin mga “coordination meetings” para dai magbaranggaan an mga actividades. Mas maray na igwang ginibong saro sanang programa sa fiesta na susunodon kan gabos na kun saen nakalaag na an mga gigibohon kan Simbahan asin Ciudad, pati mga petsa kun nuarin ini mangyayari.

Huli ta an mga actividad sa Peñafrancia Fiesta dakul an mga tawong imbwelto, kaipuhan na maayos an pagpadalagan kaini. Digdi minalaog an Joint Operation Center (JOC) kada Peñafrancia fiesta. An Simbahan asin an Ciudad kaipuhan magtinabangan ta dakul mga dapat isipon arog kan seguridad, mga kagamitan na kaipuhan, mga departamento na imbwelto, mga “emergency services,” “crowd control,” pirang mga pulis/militar an kaipuhan, arin an mga lugar na kritikal, asin kadakul-dakul pang iba na dapat asikasohon kan JOC. Mas marahay talaga kun igwang JOC ta organizado an gabos asin saro sana an pinaghahalean kan mga impormacion, interbensyon, desisyon, gigibohon, asin iba pa.

Igwa nin Memorandum of Agreement (MOA) an Simbahan asin an Ciudad kun Peñafrancia fiesta ta dyan napapalaman an “cooperative relationship” kan duwang partidong ini, kun saen pigde-detalye kun paano sindang duwa matrabahong sabay para mapangyari ninda an saindang mga objeto o mga gustong mangyaring mga bagay/actividad.

An minagalang, Fr. Bill

* * *

Email me at: billparisadmu@gmail.com