Maghapot kita ki Father

Dear Father Bill,

Ano po an boot sabihon kan Publication of Banns for Priestly Ordination?

Minagalang, Monica

Dear Monica,

An pagtawag (publication of banns) para sa ordinasyon kan mga diacono asin ma-padi sarong pormal na proceso sa Catolicong Simbahan sosog sa ley kan Simbahan o Canon Law (Can. 1051.2). Kadaklan na beses ini ginigibo sa dakul na pagtiripon nin mga tawo, orog na kun aldaw na Domingo. Inaanunsyo o ipinapaskil an mga pangaran kan oordenahan asin an aldaw kan saindang ordinasyon tanganing kun igwa man mga kaolangan maipaaram ini sa mga otoridad kan Simbahan. Obligado an mga Catolico na ipaabot an saindang mga naaaraman, orog na kun ini seryosong bagay na pwedeng magin magabat na rason tanganing an sarong kandidato sa pagka-diacono o pagpadi dai ma-ordenahan.

An pagtawag bako sana man sa pagpadi kundi pati na man sa mga kakasalon dahil gustong pasigurohon kan Simbahan an karahayan kan mag-iinagoman. Dapat an maaragom mayong seryosong kaolangan na pwedeng dai madagos an saindang kasal. Kun igwang kaolangan, dinaya si edad o may dati nang agom an saro sa kakasalon, dai na dapat ini madagos ta garo man sana mayong kasal na nangyari ta may kaolangan palan bago pa kinasal.

Kun siring, an pagtawag o “publication of banns” nagsasadol sa mga kaayon sa Simbahan na mag-participar sa paagi nin pagpaabot sa mga nanunungdan sa Simbahan kun igwa sindang mga naaaraman na kaolangan sa ordinasyon kan sarong ma-padi. Ini sarong paagi na ma-protegeran an integridad asin disiplina kan Simbahan tanganing dai ma-ordenahan an dai maninigo na mag-ako nin ordinasyon.

An minagalang, Fr. Bill

* * *

Email me at: billparisadmu@gmail.com