Maghapot kita ki Father

Dear Father Bill,

Nag-alok po nin pamibi para sa mga seminarians, padi asin mga obispo si Arsobispo Rex Andrew Alarcon. Magpangadie man po daa na magdagdag an mga bokasyon sa pagpadi. Pano po maaraman na igwa nin pangapodan sa pagpadi? Pano po maka pag-eskwela sa seminario?

Minagalang, Timothy

Dear Timothy,

Maaaraman mong igwa kang vocacion sa pagpadi kun igwa kang namamatean na hararom asin pursigidong kamawotan na maglingkod sa Dios asin sa Simbahan; pagkamoot sa Kagurangan asin sa mga katukdoan kan Simbahan; kamawotan na darahon an iba sa kabanalan; mga pagpahayag nin suporta hale sa saimong mga katood; asin iba pang senyales.

Sa paghanap mo nin kasimbagan kun talagang ika inaapod nin Kagurangnan sa pagpadi, kaipuhan mong magtao nin oras sa pagpamibi aroaldaw; mag-participar sa mga Sacramento, orog na sa Santa Misa; magin imbwelto sa mga actividad sa parokya; maghapot-hapot sa mga padi o seminarista sa saimong midbid; asin hagadon an paggiya kan saimong cura parocco o kan namamayo kan Commission on Vocation sa diocesis.

Naghahagad nin pamibi an Arzobispo para magdakul an vocacion sa pagpadi huli ta dakul an dapat maabot kan servicio kan Simbahan. Sa ngonyan, dikit an mga joven na lalaki an naglalaog sa seminario. Kadakul an pwedeng magin rason kaini, arog baga kan pagbaba kan pagpapahalaga sa relihiyon/simbahan kan sociedad; pagtao nin mas dakul na importansya sa mga materyal na bagay kaysa espiritwal; pagbabago kan istraktura/kamugtakan kan familia; hararom na pagkahilig kan mga jovenes sa teknolohiya; asin dakul pang ibang rason. Kun siring, maiintindihan ta an Arzobispo kun tano ta nag-iimbitar sa mga Catolico na magpamibi para magdakul an magkaigwa nin kamawotan na magpadi.

An minagalang, Fr. Bill

* * *

Email me at: billparisadmu@gmail.com