Maghapot kita ki Father

Dear Father Bill,

Táno ta an Octobre sinasabing Rosary Month?

An minagalang, Rea

Dear Rea,

An Octobre pigsasabing Rosary Month o Bulan nin Rosario, huli ta an Catolicong Simbahan ipinagce-celebrar an kafiestahan ni Nuestra Señora del Santissimo Rosario kada Octobre 7, bilang paggiromdom kan Christianong kapangganahan sa “Battle of Lepanto” kun saen minimidbid an dakulang tabang ni Santa Maria sa paagi kan kapangyarihan kan Santo Rosario. Ini tinogdas ni Papa San Pio V asin pig-aalok an gabos na magpamibi kan Santo Rosario aroaldaw, maghorop-horop kan mga misterio ni Cristo asin Maria, asin hagadon an proteksyon nin Mahal na Ina.

Kan nagkaigwa nin giyera sa dagat kan Octubre 7, 1571 na kun saen sarong hukbo nin mayong kalaban-laban na mga Cristiano makangalas na nanggana kontra sa mas makusog asin mas dakulang Ottoman navy. Ini sarong dakulang milagro na kun saen an kapangyarihan kan Santo Rosario dai matatawadan. Ano man na kadificilan kun dai nagluluya an pagtubod sa Dios malalampasan.

An Bulan nin Santo Rosario sarong espesyal na oras para maghorop-horop sa istorya nin kaligtasan na hinimo ni Jesus sa paagi Maria. An bulan nin Santo Rosario sarong panahon man na hagadon ta an katoninongan kan satong mga comunidad asin kan bilog na kinaban. An pagpamibi kan Santo Rosario dapat magdara sato sa mga gibong panò nin pagkamoot, paglingkod, asin pagtubod na magtatao nin inspirasyon sa lambang saro na magin tagapagdara nin katoninongan.

An minagalang, Fr. Bill

* * *

Email me at: billparisadmu@gmail.com