Maghapot kita ki Father

Dear Father Bill,

Ipagse-celebrar na naman an Aldaw kan Gabos na Santos (All Saints Day)? Ano an tabang kan mga Santo satuya?

An minagalang, Nona

Dear Nona,

Gabos kitang mga linalang inaapod nin Dios na magin santo o banal. Sa pag-celebrar kan "Dia de Todos Los Santos," hinahapot ta an satong sadiri: nabubuhay daw ako sosog sa plano nin Dios para sako" o "nalalakaw daw ako pasiring sa dalan na itinutukdo nin Kagurangnan?"

Enot, an mga Santo an satong modelo o aarogan kan pagsabuhay kan buhay ni Jesus. An mga Santo dai napapagal sa paggibo nin maray sa tahaw nin mga pagsakripisyo asin kasakitan. Sinda man an nagtatabang sato na madangog an mga pamibi nyato. Asin huli ta padangat sinda nin Dios, ipinaniwala sainda an nagkapirang mga espesyal na misyon.

Sa pagpabakal harong o propiedad, hagadon ta an tabang ni San Jose. Kun may mga nawawarang bagay, yaon si San Antonio. Kun may helang, orog na kun kanser, magpamibi ki San Peregrin. Kun may problema sa halanohan, magdolok ki San Blas. Kun may mga pangyayari na garo baga mayo nang paglaom, magrani ki San Judas Tadeo. Si mga natetentaran maggibo nin maraot, hanapon an pagsorog ni San Miguel. Si gustong marikas na kasimbagan sa pangangaipo, yaon si Santa Maria. Ini nagkapira sana sa mga halimbawa. Kada Santo nagigin agihan kan mga espesyal na biyaya nin Dios. Aramon ta an dakulang mga spiritwal na biyaya kan mga Santo.

Ikaduwa, an mga Santo tagapagdara nin pagkamoot. Nahihiling ninda an ladawan nin Dios sa gabos na tawo (maray o maraot) asin sa lambang sitwasyon. Hinahanap ninda an karahayan kan lambang saro asin hinihiling kun páno simbagon an lambang pangangaipo na pano nin pagkamoot.

Ikatolo, para sa mga Santo, pagkamoot an sukolan kan gabos sa buhay. An buhay bako an satong kwarta o mga pagsarasadiri, bako an satong trabaho o mga kabisto. An pinakamahalaga iyo an rarom kan satong pagkamoot sa Dios, sa kapwa, asin sa sadiri. Asin kun gurano ta ipinapahiling an sinceridad kan satong pagkamoot sa gabos tang ginigibo. Dai man kita mai-proclamar kan Simbahan na Santo, pero ikakaogma nin Kagurangnan na pasiring na kita sa dalan na ini.

An minagalang, Fr. Bill

* * *

Email me at: billparisadmu@gmail.com