Maghapot kita ki Father

Dear Father Bill,

Ano po an importancia kan Santacruzan? Tano ta ginigibo ini?

An minagalang, Malyn

Dear Malyn,

Kadaklan na beses, an Santacruzan ginigibo sa bilog na bulan nin Mayo asin tinatapos sa katapusan kan bulan o sa huring semana kaini. An Santacruzan sarong actividad na igwa nin halagang pan-religioso asin pan-kasaysayan. Ginigibo ini para giromdomon an pagka-diskubre kan Banal na Cruz na pinagpakuan ki Jesus na nakua kan 326 A.D. sa Jerusalem ni Sta. Elena asin kan saiyang aki na si Constantino na nagin pinakaenot na Cristianong Emperador na Romano.

Sa prusisyon kan Santacruzan igwa nin mga "Reynas" (Queens) na nagre-representar kan manlaen-laen na personalidad sa biblia, mga virtudes teologales, asin mga titulo ni Sta. Maria bilang maninigong pagtapos kan sarong bulan na devocion kan Flores de Mayo.

Sa prusisyon na ini, an ibang lugar pig-iiba-iba o pigdadagdagan pa an mga participantes na kaayon digdi. Mga joven na babae asin mga lalaki na nakasulot nin magagayon na bado; mga nakasulot nin sa anghel o arkangheles; mga doseng bitoon kan korona ni Sta. Maria; mga manlaen-laen na ideya (arog kan pitong virtudes); mga kagalang-galang na lalaki asin babae (Damas y Caballeros); o minsan ngani mga pagtaong galang kan mga anghel na may walong letra na nagbibilog kan 'Ave Maria' na dinadara kan walong mga babae na nakasulot man nin magagayon na bado.

An pagpu-prusisyon na ini iniibanan man nin mga banda na nagdadagdag kolor sa actividad. An Santacruzan pinagtukdo, pigpadagos asin pigpatalubo kan mga Kastila sa laog nin sobra sa sanggatos na taon. Ini man pigdara sa Europa asin America kan mga Pilipinong nag-erestar na duman.

An minagalang, Fr. Bill

* * *

Email me at: billparisadmu@gmail.com