Maghapot kita ki Father

Dear Father Bill,

Tano ta pigsasabi na an Pentecostes iyo an pagromdom kan pagkamundag kan Simbahan?

An minagalang, Mangay

Dear Mangay,

An Pentecostes (Pentecost) pinagse-celebrar bilang cumpleaños (birthday) kan Simbahan huli ta sa aldaw na ini huminilig an Espiritu Santo sa mga Apostoles. Huli sa mahalagang pangyayaring ini nagbago an mga disipulos gikan sa pagigin masusupgon asin nakatagong grupo pasiring sa makukusog an boot na mga misyonero. Nag-ako sinda nin kapangyarihan na magbalangibog kan Evangelio asin digdi nagpoon an pangkinaban na misyon kan Simbahan. An okasyon na ini nagdara nin darakulang pangyayari asin kapangganahan na kun saen namundag an Cristianong comunidad.

Enot, an págbolos kan Espiritu Santo. An Pentecostes ginigibo kada ika-50 aldaw pakatapos kan Pasko nin Pagkabuhay-liwat (Easter). An Espiritu Santo huminilig sa mga Apostoles asin ki Maria sa porma nin mga "dilang kalayo" (tongues of fire) na nasusurat sa Gibo kan mga Apostoles 2:1-4. Digdi nasunod an promesa ni Jesus na ipapadara niya an Parasurog (Advocate) tanganing akoon ninda an kapangyarihan. Huli sa kapangyarihan kan Espiritu, an mga Apostoles nagpoon mag-proclamar kan Marhay na Bareta sa manlaen-laen na paagi tanganing an mga tawo na nagbibisita sa Jerusalem makasabot kan saindang ipinapahayag. Sa aldaw sanang ini, mga 3,000 na tawo an nagpa-bonyag asin nag-ako kan pagtubod.

Ikaduwa, an pagpoon kan pangkinaban na misyon. Bago kaini, an mga disipulos nagtatago sa lugar na nakasararado an mga pintuan huli sa takot. Sa Pentecostes, an Simbahan nag-ako nin mga spiritual na mga bagay asin nin diosnon na otoridad na magluwas sa kinaban tanganing mahaman an misyon kaini na maipalakop an Evangelio sa gabos na nacion sa kinaban.

Kun siring, an Pentecostes nagpapagiromdom kan momentong an Simbahan nag-ako kan saiyang buhay asin misyon sa Espiritu Santo, garo man sanang an pagkamundag nagpapahiling kan pagpoon kan buhay nin tawo sa kinaban. An Simbahan dai namundag sa Cuarto sa Itaas (Upper Room) kan Huring Pamanggi (Last Supper) (cf. Mark 14:12–15 / Luke 22:7–13). Namundag an Simbahan kan nag-ontok an mga disipulos magtago asin nagluwas. Pinapagiromdom kita kan Pentecostes na kun mayo an Espiritu Santo, sagkod ngonyan baka saro sana kitang grupo, organisasyon, o "club."

An minagalang, Fr. Bill

* * *

Email me at: billparisadmu@gmail.com