Maghapot kita ki Father

Dear Father Bill,

Tano ta nagkakaigwa nin Mass of the Holy Spirit pagpoon kan klase kada taon?

An minagalang, Minerva

Dear Minerva,

An Misa kan Banal na Espiritu (Mass of the Holy Spirit) pigse-celebrar sa pagpoon kan pagklase kada taon tanganing hagadon sa Dios an gracia kan Saiyang kadonongan, paggiya, asin bendisyon. Sa pagtiripon kan comunidad kan escuelahan, pigpapahiling kaini an edukasyon bilang nakahiras asin espiritwal na misyon, na naghahagad sa Espiritu Santo na iwaras sa mga estudyante asin mga paratukdo an mga maray na gawe na kaipuhan sa bilog na taon nin pag-adal.

Tano ta igwa kan celebracion na ini? Enot, an paghanap kan kadonongan nin Dios. Sa Misa pinaghahagad an mga regalo kan Banal na Espiritu -- orog na an kadonongan, kaaraman, pakasabot, asin kusog nin boot -- na kaipuhan kan mga estuyante sa pag-adal asin kan mga maestro asin maestra sa pagtukdo.

Ikaduwa, pagpapusog sa comunidad kan escuelahan. An Misa kan Banal na Espiritu nagdadara sa bilog na familia kan escuelahan (mga estudyante, paratukdo, administrador asin empleado) nin pagkasararo, mantang tinatawan nin doon an pagkakapareho, pagkakaiba, asin pagpaorog sa katotoohan asin maray na gawe.

Ikatolo, an Misang ini parte na kan tradisyon. Ginatos nang taon ini ginigibo kan mga escuelahan , orog na kan mga Catholic Schools. An mga Jesuita asin kadakul pang ibang institusyon na Catolico naggigibo na kaini duman sa Messina, Sicily poon pa kan 1548.

Ikaapat, dedikasyon sa trabaho. An Misa kan Banal na Espiritu sarong oportunidad na maidolot sa Dios an maabot na mga hamon, mga pag-asenso, mga pagsakit, mga katuyuhan, asin mga minamawot para sa bagong taon nin pagklase.

An minagalang, Fr. Bill

* * *

Email me at: billparisadmu@gmail.com