Maghapot kita ki Father

Dear Father Bill,

Tano po ta kaipuhan atamanon an sadiring lawas o hawak kan sarong Cristiano?

An minagalang, Redon

Dear Redon,

Sosog sa katukduan kan Simbahan, an hawak nin tawo sagradong regalo, mahalagang parte tanganing mabidbidan, asin "eerokan kan Espiritu Santo." Kun siring, an pag-ataman sa salud kan hawak enot na responsabilidad nin pamamahala kan sarong tawo asin bako ining personal na desisyon. Kaipuhan mong atamanon an saimong hawak minsan pa kontra an saimong isip. Ano an mga prinsipyong imbuelto digdi?

Enot, an Pamamahala kan Salud. Sabi kan katesismo, an maray na salud kan hawak sarong mahalagang regalo nin Dios sato. Dai dapat ipagpasipara. Kaipuhan an resonableng pag-ataman sa hawak na isinasaisip an pangangaipo kan iba, asin an karahayan kan kadaklan.

Ikaduwa, an Kahalagahan kan Pagkontrol o Pagpugol kan Sadiri. Pinapagiromdom sato na an ano man na bagay na sobra makakaraot sato. Nangangapodan an Simbahan sa katamtaman na paggibo kan mga bagay asin pag-iwas sa sobrang gayong pagparakakan, alkohol, sigarilyo, o pag-inom nin mga bolong.

Ikatolo, Iwasan an Sobrang Pagpaorog kan Hawak. Kaipuhan tawan halaga an pag-ataman sa hawak, pero kaipuhan iwasan an "pagsamba sa hawak" na kun saen minamawot na magin perpekto ini, an grabeng paglilibang, o sobrang pagpaorog kan panluwas na kagayonan. An hawak maray na instrumento sa paglingkod sa kapwa asin pag-omaw sa Dios.

Ikaapat, an Pagkasaro kan Hawak asin Kalag. Huli ta an tawo may hawak asin kalag, an mga ginibo sa hawak may epekto sa satong spiritwal na buhay. Minamantener ta an dignidad kan satong hawak huli ta yaon digdi an kalag na mabalik sa Dios sa panahon nin kagadanan.

An minagalang, Fr. Bill

* * *

Email me at: billparisadmu@gmail.com