Maghapot kita ki Father

Dear Father Bill,

Sa Naga sana an Traslacion asin Fluvial Processions o pag-sakáy ki Ina. Tano po ta lakop na an mga traslacion parokya sa laog asin luwas kan Bikol?

An minagalang, Grace

Dear Grace,

Sa mga parokya digdi sa Arkidiocesis nin Caceres asin iba pang diocesis sa Bicol, may kanya-kanyang celebracion kan Peñafrancia fiesta. Si may mga salog o dagat nagigibo an pag-prusisyon ki Nuestra Señora de Peñafrancia sa tubig. Garo man sana ini an Fluvial Procession o Sakáy na ginigibo sa Bicol river sa Naga kun ibabalik na an imahen ni Peñafrancia hale sa Metropolitan Cathedral pasiring sa Basilica na saiyang estaran. Dakulang bagay na arogon ining Fluvial Procession sa manlaen-laen na parokya o lugar huli ta bako gabos makakapasiring sa Ciudad nin Naga sa kafiestahan ni Ina kun Septiembre.

An pagprusisyon sa tubig ginibo man sa iba-ibang parte kan kinaban na kun saen dinara kan mga Bikolano an saindang devocion ki Ina duman. Sabi ngani ninda, kun saen may Bicolano, may Peñafrancia. Igwa nganing panahon na nagkaigwa nin International Pilgrims Congress sa Peñafrancia Basilica. May mga debotong mga bicolano na nag-eestar na sa manlaen-laen na nasyon an nagpuruli tanganing maihiras an saindang mga ginigibong pag-devocion ki Ina. Magayon isipon na lakop na an devocion ki Peñafrancia.

Ano an ipinapahiling kaini? Si Peñafrancia, bilang Ina nin mga Bicolano, siya an saindang kusog asin katabang sa paghagad nin protekyon, paggiya, kaomayan, kusog-boot, asin inspirasyon sa Dios. Dawa saen na lugar an saindang devocion ki Peñafrancia iyo an saindang koneksyon sa Dios asin namamatean ninda na harani an Kagurangnan sainda.

Huli kaini, pag-aabot kan Peñafrancia, orog na sa mga hararayong lugar, inaarog man ninda an mga actividades na kaya nindang gibohon sa saindang lugar. Kaya an Peñafrancia Fiesta asin mga aktibidad kaini bako lang sa Naga, kundi sa mga manlaen-laen na lugar, sa mga comunidad na hararom an saindang devocion ki Inang Peñafrancia.

An minagalang, Fr. Bill

* * *

Email me at: billparisadmu@gmail.com