Maghapot kita ki Father

Dear Father Bill,

Ano po an pagka ka-iba kan archdiocesan shrine, national shrine asin international shrine?

An minagalang, Ruben

Dear Ruben,

Sa pakasabot kan kadaklan, an "shrine" (santuario -spanish; dambana - Filipino) sarong banal na lugar na itinalaga sa pagtao nin pagsamba o honra sa sarong dios, santo o banal na tawo. Para sa mga Catolico, an "diocesan," "national," asin "international shrines" mga sagradong lugar na pinagtalaga para sa hararom na pagpamibi asin mga pagbisita kan mga peregrino o mga devoto. Iba-iba an hiwas kan saindang sakop asin impluwensya, asin klase kan otoridad kan Simbahan para ma-aprobaran. Gabos sinda igwa nin natatanging pigpapalakop na devocion, espiritual na pagtalubo, formacion, asin pagsamba. Ini minapoon bilang sarong centro nin devocion sa sarong lugar o diocesis bago magparalangkaw an estado kan pakamidbid kaini.

Archdiocesan/Diocesan Shrine

Pinaglilingkodan kaini an mga Catolico na nasasakopan kan diocesis o rehiyon, nagdidirigdi an mga tawo huli sa sarong klaseng devocion na ipinapalakop kaini, orog na ki Santa Maria o sa mga Santo. Kadaklan na beses ini ina-aprobaran kan obispo kan diocesis. Igwang mga parokyang tinatawan nin pagmidbid bilang "shrine" - parokya na, "shrine" pa.

National Shrine

An mga peregrino kaini hale sa manlaen-laen na lugar kan sarong nacion, huli ta ini igwa nin halaga sa kultura, istorya asin religiosong sentimiento kan estado. An mina-aprobar kaini asin nagtatao nin pagmidbid iyo mismo an katiriponan kan mga obispo sa sarong nacion (halimbawa: Catholic Bishops Conference of the Philippines).

International Shrine

An espiritual na halaga kan devocion na ini pang-kinaban (unversal) asin an mga peregrinong nagbibisita digdi gikan sa manlaen-laen na kultura asin nacion. An otoridad na mina-aprobar kaini asin minagibo nin kasuguan iyo mismo an Holy See, an namamahala kan bilog na Catolicong Simbahan asin kan Vatican City na pinangengenotan kan Santo Papa. An halimbawa kaini an International Shrines ni Our Lady of Peace & Good Voyage (Antipolo) asin ni St. Padre Pio (Batangas).

An minagalang, Fr. Bill

* * *

Email me at: billparisadmu@gmail.com