Maghapot kita ki Father

Dear Father Bill,

Ano po ining nadadangog ming Lakbay ni Francisco: The Jubilee Relic Tour of St. Francis of Assisi? Ano an boot sabihon kaini?

Minagalang, Mercy

Dear Mercy,

An peregrinong reliquia (pilgrim relic) na nag-iikot ngonyan sa bilog na Pilipinas na inaapod "Lakbay ni Francisco" (Lakbay ni San Francisco) hale sa Blessed Ivan Merz Reliquarium (The Home of the Sacred Relics) na makukua sa Marikina City, Philippines. Alagad an sagradong reliquia na ini hale mismo sa abo kan hawak (cineribus corporis) ni San Francisco na naggikan sa lobongan niya duman sa Assisi, Italy.

An katuyan kan actividad na ini iyo an pag-celebrar kan ika-800 na taon kan saiyang kagadanan asin tanganing matawan an mga Catolico na makapaghorop-horop sa buhay nin kabanalan sa paagi kan pag-arog kan magagayon na halimbawa ni San Francisco de Asis.

Mabisita an sagradong reliquia ni San Francisco digdi sa Archdiocesis poon sa Octubre 25-30, 2026. An programa kan pagbisita iyo an minasunod:

Oct. 25 - 26 - Franciscan Friars Convent, Naga

Oct. 26 - 28 - San Francisco Parish, Naga

Oct. 28 - 29 - St. Francis Parish, Himaao

Oct. 29 - 30 - St. Francis Parish, Buhi

An "Lakbay ni Francisco" pig-endorso mismo kan Arzobispo kan Archidiocesis nin Caceres kan Octubre 20, 2026. An mga parroquia na sakop kan Central, Partido asin Rinconada iniimbitaran na makisumaro sa mga celebracion sa pinakaharaning simbahan na an patron si San Francisco sa saindang distrito.

An minagalang, Fr. Bill

* * *

Email me at: billparisadmu@gmail.com