top of page

Maghapot kita ki Father

Dear Father Bill,


Tano po ta nagpapanguros an mga Katoliko? Sa kada pagluwas harong, pag-biahe, sa pag-agi sa simbahan, an mga driver kinakaputan an cross sa rosaryohan dangan nagpapanguros.Nuarin kaipuhan magpanguros?

An minagalang, Tomas

Dear Tomas,


An pagpangurus ginagamit an toong kamot na minaporma nin cruz poon sa angog abot sa daghan asin pasiring sa waláng takyag sagkod sa too (sa ibang kultura tinatapos ini sa pagduta sa ngimot). Ini nagpapahiling nin Cristianong pagtubod o pag-apod sa langitnon na proteksyon o bendisyon. Garo siya pinalipot na pagpahayag kan “Apostles’ Creed.” Ipinapahiling ta an satong pagtubod sa sarong Dios na inaapod tang Ama, Aki, asin Espiritu Santo.


Digdi sa satong nacion, ugali kan mga pinoy na magpangurus kapag nag-aagi sa Simbahan, maluwas sa harong, maparigos, makakan, makawat, malaog sa sarong aktidad, mapabolong, asin kadakul pang iba. Dai kaipuhan lagan nin limitasyon an pagpangurus huli ta aroaldaw kita naghagad nin biyaya o pagsurog sa Dios. Kun pirmi ka nagpapangurus, mas maray.


An pagpangurus sarong magayon na kustombre ta namimidbidan ta an kapwa ta Cristiano. Ini an tandaan kan sarong parasunod ni Jesus. Siring man, ini nagpapagiromdom na kaipuhan tang atubangon an satong mga cruz sa buhay tanganing malampasan ta ini. Dai ta man lingawan na huli sa cruz na ini, sa saiyang dakulaon na pagkamoot sato, tinubos ni Cristo an kinaban. An cruz kun siring tanda nin satong kaligtasan asin ini nagdara sato nin biyaya nin bagong buhay.


An minagalang, Fr. Bill

* * *

Email me at: billparisadmu@gmail.com

댓글


bottom of page