Maghapot kita ki Father

Dear Father,

Dapat daw po kita mag pangadie nin Santo Rosario aro-aldaw maski bakong bulan nin Oktubre? Ano an karahayan na naitatao sa sarong tawo kun siya mag Santo Rosario aro-aldaw?

An minagalang, Angelo

Dear Angelo,

An Octobre iyo an bulan nin Santo Rosario. Sosog sa tradisyon, an Santo Rosario ipinahayag asin ipinagkatiwala ni Sta. Maria ki Sto. Domingo.

An 150 na “Ave Maria” iyo man an bilang kan mga Salmo sa Biblia na masakit masabotan kan kadakul na mga tawo na dai nakapag- adal kadtong panahon.

An enot na kabtang kan “Ave Maria” kinua sa evangelio ni San Lucas. An ikaduwang kabtang kani ( “Santa Maria, Ina nin Dios...” ) idinagdag kan Simbahan.

An 20 mga misterio binanga sa apat na grupo: An mga misteriong Maogmahon, Mamunduon, Magayagaya asin Liwanag. Ini nagpapahayag kan mga mayor na pangyayari sa buhay ni Cristo asin ni Maria.

An Litania, na kinua sa Sanctuario ni Loreto sa Italia, idinagdag sa pagpamibi kan Santo Rosario kan 1592.

An pamibi na “O Jesus ko patawara kami kan samong mga kasalan....” idinikta ni Santa Maria duman sa Fatima kan 1917.

Kadakul naghahapot kun nagkakasala daw an sarong tawo kun dai nagpapangadie kan Santo Rosario? An simbag: DAI NAGKAKASALA. Alagad kun maimbod an pagkamoot sa Dios asin ki Santa Maria, an pa-ulit-ulit na pagpamibi kaini gigibohon niatong parte kan satong pagkabuhay. An Santo Rosario lenguahe nin pagkamoot sa Dios sa paagi ni Sta. Maria.

An mga misterio kan Santo Rosario nagpapahayag sato kan mga misterio sa buhay ni Cristo mababasa niato sa Biblia. Kun siring, sa paghorop-horop niato kaini, mantang kita nagpapamibi, mas orog tang nasasabotan an mga agi-agi nin Kagurangnan. Mahihiling man niato an relacion kani sa satong aroaldaw na pagkabuhay.

Ngunian na Octobre, poonan na niato an pagpamibi kan Santo Rosario sa satong mga harong kaiba an pamilya. Sabi ngani ni Fr. Patrick Peyton : “ The Family that prays together, stays together.”

An minagalang, Fr. Bill

* * *

Email me at: billparisadmu@gmail.com