Maghapot kita ki Father
Dear Father,
Kitang mga Katoliko igwa man Liturgical Catholic calendar na sinusunod, pwede man daw kita mag celebrar nin Lunar New Year?
An minagalang, Teresita
Dear Teresita,
An Lunar New Year (Chinese New Year) bako man konektado sa relihiyon o sa ano man na porma nin pagsamba. Garo man sana pig-celebrar an Rizal Day o President’s Day. Sa katunayan an mga Chinese Catholics pigce-celebrar ninda yan digdi sa Pilipinas na susog sa saindang kinaugalian o kultura. Maogma ining ginigibo kan mga escuelahan, institusyon, familia asin kadakul pang mga grupo.
An kalendario kan Simbahan dai man apektado kan celebracion kan Lunar New Year. Mayo man ining rinaraot na doctrina o katukduan kan Simbahan. Sa katotoohan, saro ini sa nagpapahiling kan manlaen-laen na kultura na makukua sa Pilipinas. An mga tugang tang Muslim igwa man 2 darakulang “holidays” na inaapod Eid Al-Fitr asin Eid Al-Adha. Minsan an Ramadan saindang ginigibo taon-taon.
Kun siring pwede daw na an sarong Catolico mag-celebrar nin Chinese New Year? Pwede ining tawan nin Christianong kahulugan. Ini sarong pagpahiling nin dakulang pagpasalamat. An Chinese New Year sarong panahon nin maogmang pagpasalamat sa Kagurangnan. Sa celebracion nin pagpasalamat sa nakaaging taon, mas orog na napapakusog an pag-iribahan sa mga pagtiripon, pag-orogma, karakanan asin pagkurumustahan kan lambang saro.
An minagalang, Fr. Bill
*
Email me at: billparisadmu@gmail.com