Maghapot kita ki Father

Dear Father,

Ano po an pig-aapud na decenario saka 40 days sa nagadan na? Tano po ta mahalaga ini?

An minagalang, Milagros

Dear Milagros,

Para sa mga Cristiano, an Decenario pinoponan kadaklan na beses sa aldaw mismo kan pagkagadan kan sarong tawo. Ini sarong magayon na gawe na ginigibo sa laog nin siyam na aldaw. An gadan mayo ng kaipuhan kundi an mga pangadie kan saindang mga nawalat o mga mahal sa buhay.

An kwarentang aldaw naman sarong magayon na kustombre sa paggiromdom asin pagpamibi sa mga gadan. An Eastern Orthodox Church nagtutubod na an kalag kan gadan minatener sa kinaban nin 40 aldaw. Sa panahon na ini ipinapahiling sa kalag an realidad kan paraiso asin impierno. An 40 aldaw nin pagmundo sarong panahon para sa familia na giromdomon asin ipamibi an gadan, naghahagad kan pagkaherak nin Dios para sa nagadan.

Sa Islam, kun may nagagadan, an familia asin an comunidad nagtitiripon pakalihis nin pitong aldaw para sa “spoua.” Asin pakalihis nin kwarentang aldaw matiripon giraray para sa inaapod na “arbyin,” asin sarong taon pakalihis kan sarong taon na aniversario.

Sa biblia sinasabi na pakatapos mabuhay-liwat ni Jesus, nagkapirang beses nagpahiling si Jesus sa saiyang mga disipulos sa laog nin kwarentang aldaw, asin milagrosong suminakat sa langit. Sabi sa biblia, isinakat siya sa atubangan ninda na nahihiling kan saindang mga mata asin itinago siya kan sarong panganoron sa saindang paghiling.

Kun siring an Decenario asin an Kwarenta Dias para sa gadan mga gawe na parte na kan satong pagtubod asin kultura, orog na sa pagpamibi asin paggiromdom sa mga tugang nyatong gadan.

An minagalang, Fr. Bill

*

Email me at: billparisadmu@gmail.com