top of page

Maghapot kita ki Father

Dear Father,


Tano po ta an mga novena sa mga santo siyam na aldaw pinapangadyi?

An minagalang, Pepita


Dear Pepita,


An novena iyo an 9 na aldaw nin pribado o pampublikong pamibi para mag-ako nin espesyal na gracia, maghagad nin mga pabor o sambiton an mga personal na petisyon. An tataramon na novena hale sa Latin na “novem,” boot sabihon siyam. Kadakul na mga novena an itinalaga kan calendario sa liturgia asin an mga ini nakatakod sa mga aldaw na may pigce-celebrar na fiesta kan mga Santo.


Ano an basehan kan novena sa Biblia? Ini nangyari kan an Espiritu Santo naghilig sa mga apostoles “bilang mga dila nin kalayo” (tongues of fire) ayon sa sinasabi kan Acts 2:1-4. Ining sistemang ini nin 9 na aldaw na pagpamibi iyo an basehan kan mga novenas na pinapamibi ta ngonyan. Kun siring, an novena pag-arog kan pagsugo nin Kagurangnan sa mga apostoles kan sinda magpangadie nin siyam na aldaw bilang pag-anticipar sa paghilig kan Espiritu Santo.


An novena bako sana man bilang pag-andam sa kafiestahan kan mga Santo. Pwede ining gibohon minsan nuarin. Halimbawa, pwede ining gibohon para sa mga gadan tanganing ipamibi an saindang kalag, mapatawad an saindang mga kasalan, asin magkalaog sa katoninongan na daing katapusan sa langit.


Ano an ipinapahiling kan novena? Simbolo ini nin ano? Halimbawa, an novena sa Sacred Heart of Jesus sarong espesyal na pamibi asin devocion sa puso ni Jesus na nagpapahiling kan Saiyang pagkamoot asin pagkaherak sa katawohan.


An minagalang, Fr. Bill

* * *

Comments

bottom of page