top of page

Maghapot kita ki Father

Dear Father,


Ano an halaga kan ika-100 na taon na aniversario kan pag-korona ki Nuestra Señora de  Peñafrancia?

An minagalang, Divino


Dear Divino,


Si Nuestra Señora de Peñafrancia, o inaapod tang “INA,” bako sanang patron kan bilog na kabikolan, kundi siya sarong reyna kan satong rehiyon. Ini tinawan nin pagmidbid kan Septiembre 20, 1924 kan an saiyang imahen pinagkoronahan (pontifical coronation) bilang Reyna asin Patrona kan Bikolandia.


An nagkorona saiya iyo an representante (apostolic delegate) kan Santo Papa na si Most Rev. Guiglelmo Piani, D.D. sa Cathedral kan Naga City kun saen nakabugtak Quadricentennial Arch ngonyan. Sa panahon ini kan Amerikanong obispo kan Nueva Caceres na si Most Rev. John Bernard McGinley, D.D., sa tabang kan Asociacion de Peña de Francia (ngonyan inaapod nang Our Lady of Peñafrancia Association, OLPA) na nagpetisyon sa Santo Papang si  Benedict XV para magkaigwa nin pagkorona ki Ina (Canonical Coronation).


Kan makumpleto an duwang kinakaipuhan o kondisyon tanganing makoronahan, arog baga kan “antiquity” (kan enot/haloy nang panahon) asin miracles (mga milagro), sarong decreto an ipinaluwas kan Chapter of St. Peter’s Basilica na nag-aaprobar kan petisyon kan Mayo 13, 1920. Kundi an koronasyon nangyari pagka tapos sana kan apat na taon na nag-agi. Si Bishop McGinley nasa California na kaya si Most Rev. Franciso Reyes, D.D., bilang Diocesan Administrator an namahala kan pagkorona ki Ina kan taon 1924.


Ngonyan na maabot na Septiembre 20, 2024 iyo an ika-100  na taon na anniversario kan pagkorona saiya. Magayon an tema kan okasyon na ini asin ipinapahayag man kaini an pinaka-objeto kan okasyon - “Sé siempre la Reina: An Debosyon Atamanon, Pataluboon asin  Palakupon.” Ini na siguro an pinakamagayon na ekspresyon kan espiritu kan celebracion kan paggiromdom kan koronasyon ni Ina na sinasabing ika sa gabos na panahon an samong reyna - Sé siempre la Reina! Kaya an devocion ki Ina dapat atamanon asin ibalangibog.


An minagalang, Fr. Bill

* * *

Comments

bottom of page