top of page

Maghapot kita ki Father

Dear Father Bill,


Tanô po ta pirming magkaiba si Nuestra Señora de Peñafrancia asin Divino Rostro?

An minagalang, Alicia


Dear Alicia,


An devocion ki Divino Rostro sa ciudad nin Naga nagpoon sa panahon ni Most Rev. Casimiro Herrera, DD, Obispo kan Nueva Caceres. Kan 1882, nagkaigwa nin helang na cholera na nagpoon sa Manila, arog kan nangyari sa Spain kan taon 1834.


An Vicar General kaidto sa Nueva Caceres iyo si Fr. Pedro De La Torre na nagdakula sa Osa de la Vega (Spain) kun saen nagpoon an devocion ki Divino Rostro. Siya sarong posog na deboto kan Divino Rostro. Igwa siya retrato kaini kaya kan nagiromdoman niya si cholerang nangyari man sa saiyang banwaan, pinakiolay niya ki Bishop Herrera na ilaag an banal na retrato kan Divino Rostro sa Cathedral para makapagpamibi an mga tawo mantang dai pa nawawara an cholera. Kadakul na mga tawo an nagpapa-simbahan kaidto asin naghahagad na dai sinda magsapo o maolakitan kan cholera.


Pinagmarhay man ni Bishop Herrera na hagadon kan mga tawo an tabang ni Nuestra Señora de Peñafrancia. Kaya kan  Agosto 26, 1882, an imahen niya dinara man sa Cathedral.


Ini an pinaka-enot na an mga Bicolano nagpamibi ki Nuestra Señora de Peñafrancia asin ki Divino Rostro na magkaibahan sa sarong lugar. Ini man an kapinonan kan sarong tradisyon na ipinapadagos sagkod ngonyan, na kun saen pag-aabot kan Traslacion, an mga banal na imahen na ini dinadara sa Cathedral.


An minagalang, Fr. Bill

* * *

Comments

bottom of page