top of page

Maghapot kita ki Father

Dear Father Bill,


Tano ta dakul nin manlaen-laen na klase nin prusisyon kada Peñafrancia fiesta? Igwa nin perdon, dawn procession, pagsongko, traslacion, and fluvial? Ano pagkakaiba kan lambang saro? Arin an nagtatao nin pinakadakul na indulgencia?


An minagalang, Louise


Dear Louise,


An prusisyon, ano man na klase ini, simbolo kan satuyang paglakbay pasiring sa satong tunay na estaran duman sa langit kaibahan an Dios. An buhay ta sa kinaban sarong prusisyon pabalik sa Saiya.  Arog kan ginigibo tang prusisyon kun fiesta kan sarong Santo o kun Semana Santa, ini nagpapahiling na an paglakaw ta sa kinaban na ini igwa na kitang mga halimbawa na pwedeng pangarogan asin hagadan nin tabang sa satong mga pangangaipo.


An mga prusisyon sarong natural na porma nin pampublikong selebrasyon, sarong seremonya na maayos an dalagan asin kahanga-hanga. Kaidtong panahon an mga prusisyon simbolo nin kapangganahan. An mga hade minaprusisyon sa mga ciudad o lugar na saindang dinaog sa giyera o tinabangan na makabutas sa mga kalaban. Kaya kun kita man, bilang Cristiano kun dara ta an cruz sa pag-prusisyon, minimidbid ta si Cristong Hade na dinaog an karatan para itao satuya an regalo nin buhay na daing kasagkoran.


An mga prusisyon iba-iba an apod sainda. Ini mina-depende sa saiyang katuyuhan. Kun perdon an apod, boot sabihon ginigibo ini para sa paghagad nin kapatawaran sa mga maraot na naginibo o kun minsan may mga calamidad o epidemia na boot nyatong mawara. Kun Semana Santa, an mga prusisyon igwa nin karakter nin pag-penitencia. Kun kafiestahan kan Santo asin siya ipinuprusisyon, ini nagpapahiling kan pagpapanibago (renewal) asin pagpapapusog kan devocion kan mga tawo sa saiya.


Kun siring kadakul pwedeng magin pangaran an prusisyon na satong ginigibo ta ini nagpapahiling kan satong manlaen-laen na spiritwal na pangangaipo. An mahalaga sa lambang pagprusisyon ta, pinapagiromdom an lambang saro na kada aldaw nagpu-prusiyon na kita pabalik sa satong Ama sa langit.


An minagalang, Fr. Bill

* * *

Comments

bottom of page