Maglikay sa heat stroke - Rañola

Si Consejal Dr. Sonny Rañola, Chairman kan Committee on Health sa Sangguniang Panlungsod sa Ciudad nin Naga nagpaluwas nin aviso sa publico sa ‘‘heat stroke’’ kasunod kan paglaog na kan mga bulan nin tag-init.

Nagkapera nang hospital maging clinic an pigdadarahan nin pasyente huli kan biglang atake nin high blood sa tahaw kan init nin panahon.

Kun magiging pabaya an publico na maglikay sa init nin panahon posibleng maglangkaw an caso sa ‘‘heat stroke’’ alagad maiibitaran ini kun magiging malikay. Saro sa dapat gibohon perming magdara nin bottled water asin payong, sabi pa ni Rañola.

Kan nakaaging semana santa sa mga ginibong passion play asin lakaw penetencia sa manlaen-laen na banwaan igwang mga nadismayo sa tahaw kan tinampo mantang dai na kinaya si halangkaw na temperatura kan panahon.

Nangapudan pa an consejal sa mga Barangay Health Workers maging opisyales de barangay na patanidan an saindang residentes laban sa sinambit na helang.

Bako lang si dati nang nag-iinum nin high blood maintenance an dapat maglikay envez gabos na namamanuan, segun pa sa consejal.

Dawa sabihon kan publico na nagkulpa na an Covid-19 alagad igwa naman dapat likayan na heat stroke.

Nagpaluwas nang patanid an Philippine Atmospheric, Geophysical and Astronomical Service Administration (PAGASA) na igwa nang mga lugar na tinatamaan kan halangkaw nin temperatura. Mala ngani igwa nang kinumfirmar na si heat index sa Ciudad nin Laoag sa Ilocos Sur nag-aabot na sa 48 degrees Celsius na pigbugtak na sa ‘‘extreme danger level’’ sa saindang heat index chart.

An saro sa causa kan halangkaw na temperatura bako lang dahilan na bulan nin tag-init envez huli kan climate change.

Dinagdag pa kan PAGASA posibleng magtama man an El Nino sa nasyon sa masunod na bulan nin Mayo 2023. (DPA)