Magpabakuna na kita



Dakol pa talagang mga gurang o mga senior citizens an habong magpabarakuna ta takot sa pig-aapod na side-effect o tibaad lugod sinda daa magadan.


Puro na sana ngaya Covid an bareta sa radyo asin telebisyon. Nakaka-uyam na. Pigpaparapatakot lang daa an mga tao.


An iba ngani nagtutubod na an Covid pati an mga nagpo-positive asin nagkakagaradan sa iba sanang lugar o nasyones kan kinaban bako digdi sato.


An iba nagtutubod na negosyo man lang ini kan ibang mayayaman na tao arog kan bilyonaryong si Bill Gates.


May habong magpa-bakuna ta kun Sinovac man lang daa na hali sa Tsina dai na sana. An iba man an gusto Johnson and Johnson. Igwa man gustong maski duman sa Amerika magpatuduk basta Prizer.


Igwa pa nganing habong maggamit nin facemask o faceshield o magsunod sa pig-aapod na saro-duwang metrong social distancing lalo na kun mayong nagsisitar nin awtoridad.


Magduduwang taon na an pandemya bako lang digdi sa Pilipinas kundi sa ibang parte kan kinaban maski sa Amerika, sa Europa, sa Australia, asin dakul na parte kan Asya.


Lakop asin nagkaka-igwa nin orog na paggulpi kan kaso lalo na an mga nagkakagaradan siring duman sa India asin Indonesia.


Sa Amerika maski sinasabing gulpi na an nabakunahan asin dai naggagaramit nin facemask asin faceshield pero segun sa report nagdadakul na naman an kaso kan Covid 19 duman.


Amerika man giraray an nanginginotan.


Kan mga panahon milyones an nagagadan sa pandemya pero dai naaaraman ta mayong midya na nagbabareta.


Kan mga panahon kulang an mga doktor, mga health workers, mga bulong, kaya milyones an binabarawian nin buhay huli sa pandemya.


Ngonyan ngani na moderno na an panahon asin igwa na nin puderosong midya na nagbabareta kan mga pangyayari pero dai mapugulan an pandemya na maglakop.


Ini nin huli seguro sa pankinaban na turismo, paglibot nin tao sa enterong kinaban sa ngaran nin negosyo asin trabaho kaya sige an pauru-ulakit.


May suspensyon kan pagbiyahe, may mga lockdown, mahigpit na pag-enforsar kan mga leyes asin ordinansa tangarig magtulod kan mga pigbabawal asin mga panundon na makontrol an pagbariwas kan virus sa manlaen-laen na rona kan kinaban.


An gabos na ini minabwelta man giraray sa indibidwal na tao o persona, sa saindang disiplina asin kontrol sa saderi na maisalbar bako lang an saderi kundi an pamilya asin gabos na tao sa kinaban na dai magkagaradan huli sa Covid 19 virus na ini pati na kan man iba-ibang variants.


Tama an gobyerno na an gabos dapat magpabakuna. Magpaseguro kita.


Halion na an pamomolitika magpoon sa pig-aapod na Covid response sa mga brand kan bakuna kun saen hali, kun ano an pangaran ta an pagtubod ko may negosyo o mayo ginigibo kan gobyerno an gabos na ma-untok na an pandemya.


Mayong tuntong gobyerno na matao nin bulong o ma-ineksyon nin bakuna na magadan nin mga tao.


Trabaho kan gobyerno maski saen na parte kan kinaban na pakarhayon an kamugtakan kan tao, maisalbar sa katibaadan lalo na sa kagadanan.