MAGPANDAY ORDINANSA: Pagtransportar nin orig dapat ibawal kan LGUs

Pili, Camarines Sur--- Nag-apelar an Department of Agriculture (DA) sa mga lokal na gobierno sa Bicol na magpasar nin ordinansa nganing ma-regulate an pagtransportar kan mga buhay na orig tanganing i-viaje sa Metro Manila maging sa iba pang provincia kan Luzon.

Mayo sa kontrol kan DA nganing ibawal an pagtransportar kan ginatos na buhay na orig na trak-trak na cada semana nganing iluwas sa satong rehiyon alagad an mercado sa Bicol iyo an apektado kan suplay kan karning orig.

Si Emily Bordado, regional information officer kan DA nagsabi sa Bicol Mail ini an saindang naheheling na problema alagad an solusyon dapat ma-estrictohan an pagbawal na kan pagbakal kan viajero nganing darahon sa ibang rehiyon.

Kulang an mga nag-aataman nin orig sa Bicol huli kan African Swine Fever. (Tangkal sa Baboy FB page)

An sainda sanang nagiging aksyon iyo an pagbugtak nin checkpoint nganing dai makalusot an hayop na posibleng may tama na kan ASF. Alagad an kontrol sa pagluwas sa ibang provincia mayo na sa saindang poder.

Kaipuhan sana digdi iyo an pagpasar nin ordinansa nganing ma-monitor asin estrictohan an pagkontrol sa pagtransportar kan buhay na orig sa ibang lugar, sabi pa kan DA Bicol.

Igwa nang mga nag-aahenteng parabakal kan hayop nganing angkaton man kan viajero sa mas halangkaw na presyo, sabi pa kan DA.

Afuera pa kaini, an mga dayuhan na nagbabakal kan buhay na orig iyo pa an nagiging causa kan paglangkaw kan caso kan ASF.

Inomaw kan DA Bicol an ginibo kan lokal na gobierno kan Tigaon, Camarines Sur sa pag-estricto contra sa mga dayuhan na parabakal nin buhay na orig nganing makontrol an pagkulang kulang nin suplay sa saindang lugar asin pagtaraig na banwaan sa Partido area.

Nagparababa an suplay kan karne sa Bicol huli ta apektado an mga hog growers kan African swine fever sagcod nagkukulang na an suplay.

Nagpupuon nang magdistribuer sa mga paraoma an DA nin mga piglet sa Canaman asin Magarao nganing makatabang sa pagbalik sa suplay sa mercado alagad pinundo muna huli sa ASF.

An suplay kan karne posibleng magbuelta sa laog nin lima hasta sa anom na bulan. (DPAureus)