Makaskas na aksyon kan DPWHvs kontraktor, pigpasalamatan

Bilang aksyon tolos kan opisina rehiyonal kan DPWH Bicol, an Sangguniang Panlungsod kan Ciudad nin Naga nagpasar nin resolusyon na nagpapaabot nin gratitud asin nagaapreciar ki Regional Director Virgilio Eduarte asin sa saiyang Regional Inspectorate Team (RIT) na pinapamayohan ni ARD Marilou Lacuna nganing ipatrabaho liwat sa kontraktor an natapos na malasadong proyectong ‘‘riprap with walkways’’ sa Calauag river asin zona 6, San Felipe.

Si Consejal Vidal Castillo, Chairman kan Committee on Infrastracture kan SP kasunod kan nakaabot sa saiyang reclamo nin paraoma sa amay pagkaraot kan proyecto, tolos siyang nagsurat sa Camarines Sur 3rd Engineering District asin copy furnished si DPWH Secretary Manuel Bonoan.

Maheheling sa retrato an nagruluwas na mga bolder na agihan nin paraoma kan mismo an consejal nag-inspeksyon kan pigrereclamong proyecto asin saiya tolos na pinaabot sa sinambit na ahencia kan gobierno.

Kan Oktubre 7, 2023 nakarecibe nin surat si Castillo hali sa opisina rehiyonal kan DPWH na nag-iinpormar na an RIT team nagkunducir na nin inspeksyon asin naheling si kamugtakan kan nagruluwas na bolder asin garatak na riprap. An construction firm kan proyecto may base saManila alagad dai paman nginaranan sa resolusyon.

An proyecto nagcacantidad nin P26.6-M na pig-iimplementar kan DPWH sa konstruksyon kan flood slope protection (San Felipe-Calauag-Canaman Creek).

Dinagdag pa kan consejal huli sa makaskas na sombong sa saiya kan paraoma tolos niyang pigreclamo sa ahencia bilang pamayo kan komite sa infrastractura kan SP.

Si Consejal Vidal Castillo, Chairman kan Committee on Infrastructure kan SP nag-iinspeksyon kan malasadong proyecto kan riprap na pinatrabajo nin construction firm na naka base sa Manila.