Mall of Bicol

Kun sa San Roque Camaligan asin sa banwaan nin Bombon igua kan inaapod na Barangay Hall in the Sky ta ini halangkaw na huna mo Torre ni Solomon, puwes, puede man gayod an paradahan nin mga awto na paitaas an kamada kaya ini aapodon Parking in the Sky. Aram na kan gabos na Naguenio na an pinaka premirong problema sa Naga City alagad dai nanggad nagigibohan nin remedyo kan satuyang mga gobernantes iyo an parkingan nin mga lunadan sa centro kan Naga. Kun ika hale sa barangay o banwaan asin igua nin transaksyon o bagaman mananaod sa centro kan Naga, dai na praktikal na magdara nin awto. Anong serbe kan awto kun dai man sana ini mauusar sa paghakot kan mga sinaodan ninhuli ta mayo nin maparadahan. Dara kan kawaran nin parking sa centro afektado an mga Negosyo sa centro ta dai na nagbibisita sainda an mga customer ta mayo nin maparadahan kun kaya minadalagan sa SM, Robinson, Vista Mall, Lcc asin ngonian minatiaga na magshopping nin lagduan sa S&R o bagaman sa Landers. Napupungaw na kami sa mga dati ming amigo na dati maogma kaming nag sasarama sa pagkakan nin pancit guisado asin masiram na kape sa New China Restaurant ta mayo nin parkingan. Dai na makapanaod nin freskong sira asin mga masisiram na kamote asin freskong gulayon sa Supermarket ta mayo nin parkingan. Sa sarong “Summit Conference” sa kantong putingon, maisog na nagtribuna si Senyor Joel Tuy Borja, an tugang na matua ni Konsehal Irven Borja kan Tinambac asin ni Ret. Engr. Louie Zamudio. An mayor na tema sa summit conference, iyo an solosyon sa padagos na nagroro’ro problema sa parking sa centro kan Naga. Sa nangyaring tribuna , na an nag preside iyo si KP President Edwin Lara, naging mainit an pagribayan nin mga ediya para masolosyon an problema sa parking. Si Engr. Louie Zamudio, pigladlad sa pulpito Kan Kantog Putikon an saiyang plano asin ini an pag demolish kan Supermarket tanganing gibohon modernong anom na eskalon na “Mall of Bicol”. Ini an sadit na version kan mall of asia na siguradong dadayuhon kan mga turista ta digdi ikakaag an mga produktong bikolnon asin Pilipino. Yaon digdi an magagayon asin fully airconditioned restaurants na an mga luto, filipino, bikolano, European, Chinese, Japanese , Korean asin American. Digdi ipapahiling an magagayon na mga waitresses na ang gigibohon iyo na magsuloy nin seksi asin naka make up na potos an buhok, an mga kamot hahapulason nin mahahamot na olor asin iyo an gagamiton na pang kabit sa kamot kan mga lalaking turista sabay agda na magkakan sa saindang restaurant. Sa Plano ni Engr. Zamudio, an ground floor asin second floor iyo an mga Supermart, Boutiques, Café, asin mga Restaurant, alagad an 3rd sagkod 6th floor anas pay parking na igua nin maayahay na circular road asin may mga elevator sagkod escalator. Tunay na moderno an Mall of Bicol. Sa lado man ni Joel Tuy Borja, sinabi kaini na an target niyang modern Pay Parking iyo an Plaza Quezon sakop an kinastilyohan, ini aapodon “ The Bicol Tower”. Gagabaon asin hahalion an anuman na structure sa lugar asin itutugdok an anom na eskalon na The Bicol Tower. An first floor compuesto nin Supermart, Restaurants asin Cinema,s alagad an 3rd floor abot sa 5th floor iyo an Pay Parking ta an 6th floor iyo an Café, Fine Dining, sagkod, na palibot nin “far reaching telescope” na kayang mahiling an mga harong asin mga tawo, sa mga barangay kan Isarog asin Tangcong Vaca, kaya siguradong ini an dadayuhon kan mga turista. Sa conclusion ni President Edwin Lara, ini nag tango-tango asin nagsabi, magayon an saindang mga plano, kaya inoropakan sinda Engr. Louie Zamudio asin Joel Borja. Sa meeting kan mga opisyales kan Kantong Putikon, napag desisyonan na makipag atubang si Edwin Lara sa City Hall. Si Edwin Lara malaog sa session kan Sangguniang Panglunsod na kabit-kabit an mga kamot ninda Louie asin Joel asin duman ikukurahaw sa mga konsehales na uya na an maresolber kan problema sa parking. Bako man nanggad kasubahan an mga planong ini ta kung madagos an arin man sa duwa, Mall of Bicol o The Bicol Tower, ang Naga City dadayuhon nin mga turista asin katampad na kan Cebu asin Makati.