Mamundo asin Maogmang Politika



Nakakabigla man an nangyari ki Cong. Nonoy Andaya orog na an manera kan saiyang pagtalikod sa kinaban.


Sa totoo lang an gabos na mundo asin nagka-kurobhanan sa biglaan na pagkagadan ni Andaya sa edad na 53, dating budget secretary ni GMA asin puderosong house appropriations committee chairman, mabagsik, nagkakawat pang basketball asin maliwanag an futuro sa politika bako lang digdi sa Cam Sur kundi sa bilog na nasyon.


Si kadaogan niya kan naka-aguing eleksyon kan Mayo 9 nag-ontok kan saiyang pangaturugan sa laog nin ika-duwang beses na pamayohan an lokal na gobyerno kan Camarines Sur, pinaka-dakulang provincia sa Bikol.


Si saiyang ama na si Rolando Andaya Sr kan 1968 naka-bise gobernador na kuta kan Cam Sur na pigkokonsiderar na puso kan Bikol asin regional center kan panahon na idto kaya lang naputol an saiyang serbisyo kan biglang ideklara an Martial Law sa Pilipinas kan 1972.


Si Andaya Sr lalong suminikat kan makabali sa pig-aapod na 4 na Aguila sa eleksyon kan 1984 sa kasagsagui kan Martial Law kan ilampaso ninda an 4 na Uwak (KBL ni Marcos) sa eleksyon sa pagpili nin assemblymen kan Cam Sur sa Batasan Pambansa.


An 4 na Aguila comfuesto ninda Luis R. Villafuerte Sr, Edmundo B. Cea, Boboy Alfelor asin Rolando Andaya Sr.


Sa ibong na lado an 4 na Uwak kan KBL iyo sinda Noli Fuentebella, Juan F. Trivinio, Salvador Bigay asin Lorenzo Ballecer.


Sa kasikatan kan 4 na Aguila sa Bikol duman nagluya an sirang kan KBL kan administrasyon ni Marcos sa Kabikolan.


Kan magputok an EDSA revolution sa Pilipinas kan 1986 lalong nagsikat si 4 na Aguila: si gurang na Villafuerte naguin gobernador kan Cam Sur sa halawigon na panahon, Si Alfelor naguin pusog na congressman kan Rinconada, mantang si Andaya naguin deputy budget minister ni Cory Aquino asin chairman kan appropriations committee kan camara baja sa pinaka-halawig na panahon.


Mantang si Edmundo B. Cea na dating senador kan Bikol nagretiro na sa politika dahil sa edad. An saiyang solamenting heridero na si Sal Fortuno general manager kan saiyang radio station, naguin presidente kan Casureco 2, naguin vice- governor sa halawig na panahon, naguin pusog na congressman kan Rinconada asin sinundan kan saiyang esposa na naguin congresswoman na daing daogan.


Mayo lamang naghuhuna na mabubungkag an lipotok na iribanan kan 4 na Aguila. Pero nangyari an bagay and the rest is history.


Mayo talagang permanenting amigo asin kaiwal sa politika ta an lambang politiko o nagkakandidato may kanya-kanyang intereses asin panganga-ipo.


An ika-duwang henerasyon kan 4 na Aguila suruhay-suhay na.


An Villafuerte pugol an Capitolyo, an Fuentebella iyo an hade kan Partido area, pero nabutasan na kan Alfelor an Iriga City asin Rinconada pati an 1st district na dating kontrolado kan Andaya nakabalyo na sa kamot kan mga pinsan man lang ni Andaya na kaalyado kan mga Villafuerte.


An Libmanan na pinaka-dakulang banwaan sakop na ni LRay Villafuerte bilang Congressman.


An ciudad nin Naga sa centro kan Bikol asin pinaka-dakulang ciudad kontrolado kan Robredo family na pigtutubudan na parti kan Villafuerte dynasty.


An aki ni Sal Fortuno Sr (heridero ni senador Cea nagpopoon na na maguin bise-gobernador en preparasyon sa mas halangkaw asin puderosong posisyon.


Sa padagos na encontrada entri sa mga juven na Villafuerte asin Andaya na tapos kan eleksyon kan Mayo alagad lalong makulog si mga pangyayari dahil sa pagkaputol kan buhay kan juven na Andaya.


Sa mga biglang pangyayari sa politika sa Cam Sur piglalaoman na tibaad lamang mapakarhay na an dalagan sa masunod na eleksyon maguin modelo man lugod kan kondukta kan magayon na politika sa Cam Sur na papangarugan sa ibang parti kan nasyon.