Manga envuelto sa ‘kontra bigay’ pinadarahan na nin SCO

Apesar kan lakop na reclamo sa barakalan nin boto alagad an Commision on Election (Comelec) nagsabi na igua sanang 45 reclamo an nakaabot sa saindang opisina digdi sa Bicol hale sa anom na provincia kan rehiyon.

Tolos sinda nag-aksyon pinadarahan na nin show cause orders (SCO) an envueltong mga candidato sa barakalan nin boto antes kan pirilian kan Mayo 12, 2025.

Alagad nagtutubod si Regional Director Atty. Maria Juana Valeza, posibleng an iba direkta nang nagreclamo sa komitiba “kontra bigay” sa opisina sentral sa Manila.

Sa listahan kan Comelec Bicol an Catanduanes iyo an may halangkaw na pigreclamo na nag-abot sa 27, 15 sa Camarines Sur, 2 sa Albay asin saro sa Sorsogon.

An Comelec nagtutubod na posibleng igua pang maghabol nin reklamo sa vote-buying asin iba pang electoral violations depende sa mareclamo kun mawot pa nindang ipadagos.

Sa mga mareclamo dapat kumpleto an pangaran kan envueltong indibidwal, lugar, oras asin anong petsa kan insidente, kabale na an iba pang mga evidencia siring kan photographic o video evidence.

Sa Albay, an Provincial Office kan Comelec digdi pigrereclamo na mayong ginigibong aksyon sa mga vote-buying. Alagad sinabi ni Provincial Election Supervisor Atty. Ma. Aurea Bo-Bunan dai man sinda nakakarecibe nin opisyal na reclamo na dapat kumpleto nin evidencia bakong sa paagi sana nin media.

Sa PNP Bicol, si BGen. Andrew Dizon nagsabi na kagabsan heneralmente naging matuninong si paz y orden sa nagtapos na midterm elections kun igua man nangyari nadakop tolos kan mga awtoridad an envueltong mga nagpapasaway mantang si mga nakumfiscaran nin mga armas nag-aatubang na nin caso sa corte.