Manga nagsalisi sa Jewelry Shop luwas laog an operasyon sa Naga

Igwa nang mga suspechado an Naga City Police Office (NCPO) sa P1.4 milyon pesos na cantidad nin alahas na sinalisi sa sarong Jewelry Shop sa Yashano Mall sa Barangay Triangulo, Ciudad nin Naga kan Sabado Hulyo 2, mga alas 12:14 nin hapon alagad pigtutubodan na luwas laog sa ciudad an saindang operasyon.


Sa pinakahuring imbestigasyon na ginigibo kan Police Station 5 kan NCPO sa pamamayo ni Police Major Alex Sumayao, ipinahayag na nag-rerecord sana an CCTV alagad dai nakasaksak o naka-unplug an CCTV camera sa laog kan Jewelry Shop kan Gold Gram, mantang sa luwas kan shop igwang nakua an NCPO kan magluwas an mga suspechado alagad dai gabos nakuanan nin camera.


Pigtutubodan pa kan NCPO na dati nang luwas laog sa ciudad an operasyon kan mga suspechado na kaparejo man an saindang estratihiya sa ibang lugar.


Sa pahayag man sa media ni Lt. Col. Errol Garchitorena Jr. Deputy City Director kan NCPO dapat aramon an ‘‘background’’ kan mga nakapalibot sa shop maging kan personajes.


Dinagdag pa ni Sumayao an tendera solo sana poon pa kan Febrero 2022.


An Police Station 5 igwa nang posibleng ‘‘persons of interest’’ sa nagpapadagos na imbestigasyon kan caso.

Pinapaheling kan tindera sa pulis na inarahit an P1.4-M na alahas sa laog kan saindang eskaparate. (NCPO)


An sinambit na insidente nangyari pasado alas 12:00 nin udto kan Hulyo 2 kan laogon kan sagin-sagin na mga kustomer na kinababalehan nin limang lalaki, kabale an sarong bakla asin duwang babae.


Sa osip sa NCPO, mientras na an saleslady nag-aasister sa sinambit na mga kustomer na sarabay na naglaog sa jewelry shop na nagpapabistong mabakal sinda nin alahas.


Mientras na an mga suspechado nagheheling sa mga display sa eskaparate, saro sa suspechado na nakasulot nin rosas na polo shirt, gray pants, brown na sapatos, an nagrani sa saiya asin naghahapot sa presyo kan hikaw, alagad an saro sa sainda nagpa-aram na ma-withdraw nin cuarta, dai nahaloy biglang naghale an grupo sa shop.


Digdi na naaraman kan tindera na an mga alahas sa eskaparate an nawawara na kinababalehan kan 80 pedasong bulawan na singsing an nalalay na nagcacantidad nin P1.4 milyon.