Manga proyecto sa MPB winarak ni Bordado sa Naga

An Multi-Purpose Building (MPB) saro sa prioridad ni Congresista Gabby Bordado kan tercer distrito kan Camarines Sur sa mga barangay na dai pa inaabut kan proyecto sa Ciudad nin Naga.


An punto digdi nin huli ta an MPB dakulang bagay kun nagkakaigwang bagyo puedeng dagosan nin mga evacuee bako lang magagamit sa mga conferencia o seminar maging iba pang tiripon sa barangay envez panahon nang andaman bilang evacuation center kan barangay.


Si dating Alcalde Abang Mabolo, Chief of Staff ni Congresista Bordado nagpahayag kaini mantang sunod-sunod an mga ginibong groundbreaking ceremony kan bulan nin Noviembre asin igwa pang isusunod ngunian na Deciembre 2020 afuera kan dugang na mga patinampo asin school bldg. sa barangay.


Puon kan Noviembre 11 hasta kan Noviembre 25 ginibo an magkasuruhay na groundbreaking/earthmoving kan mga MPB sa manlaen-laen na barangay kan ciudad na presente si Alcalde Nelson Legacion, mga opisyales lokal kan City Hall asin Assistant District Engr. Richard Ragragio kan 3rd Engineering District kan Department of Public Works and Highways (DPWH) sa Camarines Sur na iyo an ma-implementar kan proyecto.


An fondo hale sa infrastructure project kan congressional district ni Bordado base sa General Appropriation Act of 2020, sabi pa.

An na-enot na groundbreaking ceremonies ginibo sa mga minasunod na barangay kun saen digdi ipapatindog an proyecto; 1. Brgy. Sta Cruz Evacuation Center, 2. Tinago Central School MPB; 3. Brgy. Tinago MPB; 4. Brgy. Sabang MPB; 5. RV/Maramba sa brgy. San Felipe asin Lomeda Subdivision MPB; 5. Brgy. Cararayan MPB; 6. Brgy. Sabang MPB; 7. Brgy. Balatas MPB asin kasabay na an Balatas Training Hall, urban agriculture farm asin 8. Brgy. Calauag MPB.


Sa Deciembre 9, groundbreaking ceremony kan Barangay Mabolo MPB.


Sa mga proyecto sa patinampo kinababalihan ini kan ceremonial opening drive kan Cararayan – San Isidro SLF road na ginibo kan Noviembre 20, earthmoving ceremony kan Naga City Science High School-Balatas Road na pigtalaan sa Deciembre 16.


Igwa man kaparejong mga proyecto sa MPB na naenot na sa ibang mga barangay kan ciudad maging sa nagkaperang mga barangay kan tercer distrito, sabi pa ni Mabolo.