Manga proyekto lokal kan DPWH ibabalyo na sa LGUs

Ibababa na sa mga lokal na gobierno an nagkaperang proyekto sa infrastraktura asin maguguntingan pa nin fondo an Department of Public Works and Highways (DPWH) puon sa taon 2022 kasunod kan pag-epekto kan Mandanas-Garcia ruling.


Si mga proyekto lokal sana siring kan municipal asin barangay road asin multipurpose building dapat mga LGU na an mag-implementar alagad si mga proyekto nasyonal sa obras publica man giraray.


Ini an mga pahayag ni Assistant District Engineer Richard Emmanuel Ragragio kan Camarines Sur 3rd Engineering District kan DPWH mantang nag-aandam na an LGUs kan devolution transition plan.


An congressional fund kan representante kan sarong distrito dai man hahaleon sa saindang diskresyon an pagtaga nin fondo sa lokal na proyekto maging nasyonal.


Kan bulan nin Hunyo 2021 si Presidente Rodrigo Duterte nag-isyu nin Executive Order No. 138 sa implementasyon sa pagbalyo kan mga gagastoson na fondo sa mga proyekto sa infrastraktura, agricultura, social welfare health care, livelihood asin iba pa.


Ini kasunod kan Mandanas-Garcia ruling asin pag-devolve kan mga ahencia nasyonal sa LGUs mantang malangkaw na sa 37.89 por ciento an saindang marerecibing National Tax Allotment (dating internal revenue allotment).


An Mandanas ruling resulta man kan petisyon sa Corte Suprema ninda Batangas asin dating pamayo kan Liga nin mga Gobernador asin dating Gobernador Enrique Garcia Jr. kan Bataan. An En Banc decision kan Corte Suprema binaba kan Hulyo 3, 2018.


Sa desisyon si national taxes bako lang hale sa Bureau of Internal Revenue (BIR) dapat kabale an LGUs na makarecibe nin dakulang tipak sa General Appropriation Act asin huli kaini, naglangkaw sa 37.89 por ciento an saindang NTA cada taon.


An Department of Interior and Local Government (DILG) nagsugo na sa LGUs na magbilog nin devolution transition team nganing magsikad na an saindang pag-aadal kan magiging punksyon base sa seksyon 17 kan Acta Republica 7160 o Local Government Code.


Kadakle kan mga ahencia nasyonal apektado kan Mandanas – Garcia ruling. (DPAureus)